Për herë të parë, Shqipëria do të jetë vendi nikoqir i Konferencës Vjetore të Shoqatës Ndërkombëtare të Mbikëqyrësve të Sigurimeve (IAIS), e cila do të organizohet nga Autoriteti i Mbikëqyrjes Financiare (AMF) nga 10 deri më 14 nëntor 2025, me aktivitetin kryesor më 13 nëntor në Teatrin Kombëtar të Operas dhe Baletit në Tiranë.
Drejtoresha e Përgjithshme Ekzekutive e AMF-së, znj. Mimoza Kaçi, vlerësoi këtë ngjarje si një moment historik për Shqipërinë, duke theksuar se ajo do të forcojë bashkëpunimin ndërkombëtar dhe do të promovojë vendin si partner në fushën e mbikëqyrjes së tregjeve të sigurimeve. Pjesëmarrësit e pritur janë rreth 500 përfaqësues nga autoritetet rregullatore të sigurimeve, industria ndërkombëtare dhe institucione si Banka Botërore, FMN, OECD, Bashkimi Evropian dhe EIOPA.
Gjatë tre ditëve të para, do të zhvillohen mbledhje të komiteteve teknike të IAIS, ku do të marrin pjesë mbi 230 drejtues të autoriteteve rregullatore nga më shumë se 150 vende. Programi do të përfshijë takime bilaterale mes institucioneve mbikëqyrëse dhe diskutime strategjike me liderët e kompanive ndërkombëtare të sigurimeve, duke krijuar mundësi për partneritete të reja.
Një nga ngjarjet kryesore do të jetë Forumi i EIOPA-s me temën “Advancing Insurance Reforms on the Path to European Integration”, që do të trajtojë sfidat dhe mundësitë e integrimit evropian për vendet kandidate, duke përfshirë Shqipërinë. Pjesëmarrësit do të kenë mundësinë të ndajnë përvojat dhe të diskutojnë reformat e nevojshme që duhen zbatuar në këtë drejtim.
Pas organizimeve në Tokio dhe Cape Town, përzgjedhja e Tiranës për 2025 është një vlerësim i rëndësishëm për Shqipërinë, duke reflektuar rritjen e rëndësisë së saj në harten ndërkombëtare të sigurimeve. Kjo konferencë vjen në një kohë kur tregu shqiptar i sigurimeve po kalon reforma të rëndësishme, duke e bërë atë një mundësi për të rritur besueshmërinë dhe vizibilitetin në nivel global.
