Ambasadori i OSBE-së në Shqipëri, Michel Tarran, nga Korça foli për të drejtën e qytetarëve për të protestuar, duke u ndalur te tubimet në Tiranë që zgjasin 41 ditë, klima politike dhe nevoja për forcim të dialogut mes palëve. Ai vlerësoi që protestat janë pjesë normale e jetës demokratike dhe u shpreh i kënaqur që në Shqipëri ato mund të organizohen dhe zhvillohen në mënyrë paqësore dhe qytetare. Tarran pranoi se ka pasur disa incidente, por sipas tij, pas mbi një muaji nuk ka pasur incidente të rëndësishme dhe pjesëmarrësit kanë vepruar në mënyrë civile.
Ambasadori tha se nuk është mandati i tij të hyjë në debat për kërkesat specifike të protestuesve, por nënvizoi rëndësinë që të drejtat e qytetarëve për t’u marrë pjesë në protesta të respektohen nga autoritetet dhe inkurajoi dialogun kur është i mundur. I pyetur për polarizimin politik dhe ndikimin e tij në shoqëri, Tarran shpjegoi se ekzistenca e poleve të ndryshme politike është normale dhe karakteristikë e demokracive, duke theksuar se të paktën teorikisht polari të ndryshme me programe të ndryshme është një gjë pozitive.
Megjithatë, ai shprehu shqetësim për mënyrën se si bashkëpunojnë dhe diskutojnë këto pole, duke vënë në dukje se niveli i dialogut politik në Shqipëri “nuk është në nivelin e duhur”. Tarran foli jo vetëm për përmbajtjen e dialogut, por edhe për mënyrën e të shprehurit, duke theksuar se mund të ketë ide kundërshtuese që duhet të shpreheshin në mënyrë të sjellshme dhe të pranueshme. Ai u shpreh i shqetësuar për përdorimin e gjuhës së urrejtjes dhe tha se OSBE-ja do të punojë për të parë se çfarë mund të bëjë për të ndihmuar në luftën kundër kësaj gjuhë, e cila sipas tij është e papranueshme.
Tarran shtoi se mosdakordësitë me fqinjët apo kolegët janë normale, por theksoi nevojën për diskutim të rregullt, organizim të zgjedhjeve dhe respektim të rezultatit të tyre, si dhe për mënyra të mirëpërcaktuara për dialog me opozitën dhe brenda partive.
