Policia e Dibrës ka reaguar pas një publikimi në rrjetet sociale që pretendonte se një drejtues automjeti ishte ndaluar nga persona të armatosur pranë tunelit të Qafës së Buallit dhe se telefonatat e bëra për të kërkuar ndihmë në Komisariatin e Policisë Bulqizë nuk kishin marrë përgjigje. Menjëherë pas marrjes së informacionit, Drejtoria Vendore e Policisë Dibër nisi verifikimet për sqarimin e plotë të rrethanave të pretenduara.
Kontrolli i regjistrave të Sallës Operative të Komisariatit të Policisë Bulqizë tregoi se nuk rezulton të jetë regjistruar asnjë telefonatë në lidhje me këtë rast. Për më tepër, deri tani asnjë qytetar nuk është paraqitur pranë strukturave të Policisë për të bërë kallëzim lidhur me ngjarjen e pretenduar. Megjithatë, edhe në mungesë të një denoncimi formal, Drejtoria Vendore e Policisë Dibër dhe Komisariati i Policisë Bulqizë po vijojnë verifikimet për të përcaktuar vërtetësinë e postimit të publikuar në rrjetin social JOQ.
Në reagim theksohet se Policia është e angazhuar për trajtimin serioz të çdo denoncimi dhe ftohet qytetari që pretendon të ketë qenë viktimë e ndalimit nga persona të armatosur të paraqitet pranë strukturave të Policisë për të bërë kallëzim. Autoritetet i kërkojnë atij të japë çdo informacion që mund të ndihmojë në identifikimin e autorëve dhe në zbardhjen e plotë të rrethanave të ngjarjes.
Policia ka nisur procedurat e verifikimit nga momenti i marrjes së informacionit dhe po mbledh të dhëna për të konfirmuar ose sqaruar pretendimet e bërë në publikim. Deri në përfundim të këtyre verifikimeve, institucionet policore nuk konfirmojnë shkresa, telefonata apo kallëzime që lidhen me ngjarjen e pretenduar, por vazhdojnë hetimet për të përcaktuar realitetin e situatës së raportuar në rrjetin social.
