KOSOVË- Pas alarmit për bombë në Kuvendin e Kosovës, policia ka nisur hetimet në bashkëpunim me institucionet e tjera të sigurisë për të zbuluar se nga ka ardhur mesazhi kërcënues. Sipas njoftimit të Policisë së Kosovës, nga hetimet e deritanishme dyshohet se kërcënimi është bërë përmes një thirrjeje telefonike që ka ardhur nga një numër me origjinë të dyshuar nga Serbia.
“Hetimet po vazhdojnë në koordinim të plotë me prokurorinë kompetente, si dhe me partnerët ndërkombëtarë të sigurisë, me qëllim të lokalizimit të burimit të kërcënimit, identifikimit të mjeteve dhe rrjeteve të komunikimit të përdorura”, thuhet në njoftimin e Policisë.
Alarmi për bombë ka ardhur në orët e paraditës se djeshme ku u krye evakuimi i deputetëve nga Kuvendi, ku pritej vazhdimi i seancës konstituive. Pas konfirmimit se alarmi ishte i rremë, seanca është zhvilluar me vonesë dhe është ndërprerë sërish pa sukses.
