Një mjek amerikan që ishte pjesë e një ekipi misionarësh mjekësorë në zonat e prekura nga shpërthimi i Ebolës në Republikën Demokratike të Kongos doli pozitiv me virusin dhe u transportua me urgjencë në Gjermani për trajtim të specializuar. Sipas autoriteteve shëndetësore amerikane, ai shfaqi simptoma gjatë fundjavës, çka detyroi organizimin e transferimit të menjëhershëm. Gjashtë persona që kanë pasur kontakte të afërta me mjekun janë ende në Kinshasa dhe deri tani nuk kanë shfaqur simptoma, sipas Dr. Satish Pillay, menaxher i incidenteve të Ebolës në Qendrat për Kontrollin dhe Parandalimin e Sëmundjeve (CDC).
Autoritetet amerikane po shqyrtojnë mundësinë e transferimit të grupit në një strukturë karantine të sigurt, ndoshta në një bazë ushtarake në Gjermani, megjithëse kjo nuk është konfirmuar zyrtarisht. Ndërkohë, situata në Afrikë po përkeqësohet: Qendra Afri kane për Kontrollin dhe Parandalimin e Sëmundjeve raporton të paktën 100 viktima dhe më shumë se 390 raste të dyshuara në Republikën Demokratike të Kongos. Në Ugandë janë konfirmuar dy raste dhe një viktimë. Autoritetet shëndetësore bëjnë të ditur se varianti aktual i virusit, i njohur si Bundibugyo, nuk ka ende vaksinë apo trajtim të miratuar.
Për shkak të rrezikut të përhapjes ndërkombëtare, Organizata Botërore e Shëndetësisë ka shpallur shpërthimin e Ebolës emergjencë ndërkombëtare shëndetësore. Kreu i Qendrave Afrikane për Kontrollin dhe Parandalimin e Sëmundjeve, Jean Kaseya, ka bërë thirrje që qytetarët të respektojnë masat e shëndetit publik, përfshirë procedurat e sigurta gjatë funeraleve të viktimave.
Shtetet e Bashkuara kanë nisur zbatimin e masave parandaluese: CDC thotë se rreziku për popullsinë amerikane mbetet relativisht i ulët, por po forcohen kontrollet për udhëtarët nga zonat e prekura. Masat përfshijnë kontrolle shtesë në aeroporte, gjurmimin e kontakteve të pasagjerëve dhe kufizime hyrjeje për shtetasit jo-amerikanë që kanë qenë në Kongo, Ugandë ose Sudanin Jugor gjatë 21 ditëve të fundit. Autoritetet amerikane kanë gjithashtu lëshuar një paralajmërim udhëtimi të Nivelit 4 për zonat e prekura në Kongon lindore.
