ITALI- Një aksident tragjik ka ndodhur mesditën e së martës në Itali. Konkretisht aksidenti ka ndodhur në autostradën A1 në provincën e Firences, përgjatë segmentit Variante di Valico, brenda tunelit “di Base”. Mësohet se një kamion u përplas me një automjet, duke shkaktuar vdekjen e tre burrave dhe plagosjen e rëndë të një gruaje dhe një vajze të mitur.
Gjithashtu bëhet me dije se automjeti në të cilin udhëtonin viktimat dhe të plagosurat dyshohet se është ndalur papritur brenda tunelit. Disa makina që udhëtonin pas tij arritën të shmangnin përplasjen, por jo edhe kamioni, i cili, pavarësisht përpjekjes për të frenuar, nuk mundi të evitojë aksidentin e rëndë.
Megjithatë shkaku i saktë i aksidentit është ende në hetim nga autoritetet italiane, të cilat po analizojnë pamjet nga kamerat e sigurisë në tunel për të sqaruar rrethanat e ngjarjes. Ndërkohë forcat e zjarrfikësve dhe ekipet e shpëtimit mbërritën menjëherë në vendngjarje, por për fat të keq, mjekët konstatuan vdekjen e menjëhershme të tre burrave. Po ashtu gruaja 35-vjeçare dhe vajza e mitur u dërguan me helikopter në spital në gjendje kritike për jetën.
