Një aksident me vdekje ndodhi në aksin rrugor nacional Berat–Dimal, në fshatin Moravë. Sipas raportit, një automjet që po lëvizte me shpejtësi përplasi një 63-vjeçar që po qarkullonte me biçikletë. Viktima, Kadri Skura, 63 vjeç, humbi jetën në vendngjarje.
Gjatë përplasjes u plagos edhe një këmbësore, shtetasja Dh.A., 63 vjeçe. Ajo u dërgua me ambulancë në Spitalin Rajonal Berat, ku po merr ndihmë mjekësore dhe raportohet se ndodhet jashtë rrezikut për jetën.
Në vendngjarje mbërriti grupi hetimor, i cili kreu veprimet procedurale për sqarimin e rrethanave dhe përcaktimin e shkakut të aksidentit. Pas ngjarjes, policia shoqëroi drejtuesin e mjetit, shtetasin Jani Dashi, për të marrë deklarimet e tij në lidhje me aksidentin e rëndë.
