Për gati dy dekada Besnik “Nik” Shembitrasi ndërtoi jetën e tij në Shtetet e Bashkuara, ku punoi si berber në zonën e Çikagos, u martua me një shtetase amerikane, krijoi familje dhe rriti një vajzë. Në maj të vitit 2026 ai u arrestua nga Zyra Amerikane e Imigracionit dhe Doganave (ICE) pranë banesës së tij në Illinois dhe më pas u deportua në Shqipëri, duke i dhënë fund pranisë së tij 20-vjeçare në SHBA. Rasti ka nxitur reagime në komunitetin shqiptar dhe atë amerikan.
Xhaxhai i tij, Frank Shemitraku, pronar i disa berberhaneve në Illinois, tha se Niku ishte mashtruar kur kërkoi të emigronte dhe se shumë shqiptarë pas rënies së komunizmit ranë pre e personave që premtonin dokumente të rregullta. Ai deklaroi se “Ata premtojnë: ‘Unë të marr vizë’. Kishte shumë djem të tillë. Por viza ishte false. Nuk ishte faji i tij. Ai pagoi paratë për të ardhur në SHBA” dhe shtoi se Niku “punoi shumë dhe i pagoi paratë. Ai u bë viktimë e kriminelëve.”
Nga ana tjetër, ICE njoftoi se Shembitrasi kishte hyrë në SHBA në vitin 2005 me një pasaportë italiane të falsifikuar dhe se në vitin 2008 i ishte dhënë një urdhër përfundimtar dëbimi, të cilin ai nuk e kishte zbatuar. Agjencia e cilësoi atë si një “të huaj të paligjshëm kriminal”.
Historia mori jehonë edhe më të madhe pasi shkrimtari amerikan Bill Ward publikoi një ese kushtuar berberit shqiptar, të cilit i kishte prerë flokët për shtatë vjet. Në ese, Ward e përshkroi Nikun si një njeri punëtor dhe të përkushtuar ndaj familjes, duke pranuar se ai kishte shkelur ligjin e emigracionit, por duke theksuar dallimin mes asaj që është e ligjshme dhe asaj që është e drejtë. Eseja përfundon me fjalët: “Ky nuk është, në asnjë mënyrë kuptimplotë, një ‘kriminel’. Ky është Niku Berberi. Shqiptar nga lindja, amerikan në shpirt.”
Burimi i informacionit: Top Channel.
