Jose Mourinho, i cili ende nuk është prezantuar zyrtarisht si trajner i Real Madridit, ka vazhduar të japë sinjale për projektin e tij të ardhshëm në “Santiago Bernabéu”, duke folur për filozofinë dhe planet me skuadrën. Në një intervistë në podcast-in “Beast Mode” të ish-futbollistit Adebayo Akinfenëa, trajneri portugez ka hedhur poshtë zërat se mund të largojë disa nga yjet e skuadrës, duke theksuar se dëshiron të punojë me lojtarët më të mirë të mundshëm. “Kam lexuar komente që thonë se Mourinho do të vijë dhe do të heqë qafe disa nga lojtarët më të mirë. Jo! Unë i dua ata lojtarë. Dua më të mirët”, u shpreh ai, duke mohuar spekulimet për largime të mëdha brenda ekipit.
Mourinho sqaroi se synimi kryesor është ndërtimi i një skuadre të fortë dhe eliminimi i problemeve që, sipas tij, kanë shfaqur vështirësi në sezonet e fundit. “Tani duhet të gjej mënyrën për të krijuar një skuadër dhe për të shmangur problemet që, sipas asaj që kam lexuar, kanë ndodhur në sezonet e fundit”, tha trajneri, duke vënë theksin te nevoja për një grup të bashkuar dhe të stabilizuar.
Ai theksoi gjithashtu se cilësia individuale e lojtarëve nuk mjafton nëse nuk shoqërohet me konsistencë fizike dhe mendore. “Nëse një lojtar ka shumë cilësi, por nuk është konstant, atëherë nuk është një lojtar i madh. Lojtari i madh duhet të jetë i fortë teknikisht, fizikisht dhe mendërisht, si dhe të luajë për ekipin”, deklaroi Mourinho, duke nxjerrë në pah rëndësinë e stabilitetit dhe përkushtimit kolektiv.
Në përfundim, ai nënvizoi edhe rolën e trajnerit në menaxhimin e yjeve dhe përshtatjen e tyre me idetë taktike dhe filozofinë e skuadrës. “Një nga cilësitë e trajnerit është të bëjë që lojtarët të përshtaten me idetë e tij”, tha Mourinho, duke përmbledhur qasjen e tij drejt ndërtimit të një grupi që përputhet me pritshmëritë dhe kërkesat e tij sportive.
