Në Agjencinë Kombëtare të Mbrojtjes Civile (AKMC) u mblodh Komisioni Teknik Këshillimor për masat ndaj sezonit të zjarreve, i kryesuar nga drejtori i përgjithshëm i AKMC-së Haki Çako dhe përfaqësues të strukturave përgjegjëse për mbrojtjen civile. Në mbledhje morën pjesë, ndër të tjerët, gjeneral brigade Razije Mehmeti, zëvendësshefi i Shtabit të Përgjithshëm të Forcave të Armatosura; Arben Cara, drejtor i Përgjithshëm i Mbrojtjes nga Zjarri dhe Shpëtimi; Skënder Brataj, drejtori i Qendrës Kombëtare të Urgjencës Mjekësore; dhe Dhimitraq Ziu, drejtor i Departamentit të Rendit dhe Sigurisë në DPPSH. Ata diskutuan gatishmërinë për mbështetje tokësore dhe ajrore, kapacitetet logjistike dhe intervenimet në mbështetje të strukturave vendore.
Gjatë takimit u analizua situata e krijuar nga temperaturat e larta dhe u vlerësua angazhimi i strukturave vendore, rajonale dhe qendrore në menaxhimin e zjarreve. Drejtori Çako bëri të ditur se nga data 22 qershor deri në ditën e sotme janë regjistruar 160 zjarre në të gjithë vendin. Nga këto, 127 raste kanë prekur sipërfaqe me bimësi, shkurre, ferra, pyje dhe mbetje urbane, ndërsa 33 raste janë cilësuar si zjarre urbane, të cilat janë menaxhuar nga Mbrojtja nga Zjarri dhe Shpëtimi.
Çako nënvizoi se Qeveria vijon të investojë në forcimin e kapaciteteve të mbrojtjes civile përmes fondeve të kushtëzuara dhe mbështetjes së prefekturave. Ai theksoi se suksesi në përballimin e zjarreve kërkon edhe bashkëpunimin e qytetarëve për raportimin e menjëhershëm të vatrave të zjarrit, duke shtuar se sinjalizimi i hershëm mbetet element kyç për ndërhyrje të shpejta dhe efektive. Po ashtu u bë e ditur se Qendra Kombëtare e Emergjencave Civile në AKMC është në gatishmëri 24/7 dhe në koordinim intensiv me të gjitha qendrat dhe operatorët kryesorë të strukturave operacionale, përfshirë Policinë e Shtetit, Urgjencën Mjekësore, Mbrojtjen nga Zjarri e Shpëtimin dhe Forcat e Armatosura.
