Për më shumë se dy orë ministri i Jashtëm Ferit Hoxha iu përgjigj pyetjeve të deputetëve lidhur me fazën e negociatave për anëtarësim në BE, raportin IBAR dhe një editorial të kryeministrit Rama dhe presidentit të Serbisë, Vuçiç, në median gjermane. Gjatë seancës debati u fokusua kryesisht te pyetjet e deputetit demokrat Belind Këlliçi për një të afërm të ministrit të përfshirë në hetimet e SPAK lidhur me skandalin e AKSHI-t.
Këlliçi kërkoi të dijë nëse Hoxha ndodhet në konflikt interesi pas një vendimi të GJKKO-së, një muaj më parë, për caktimin e masës së sigurimit pasuror ndaj një sërë personash që po hetohen në kuadër të procedimit penal nr. 20/1 të vitit 2025. Ai përmendi emrin e zotit Gëzim Hoxha si të dyshuar për “pastrim i produkteve të veprës penale” dhe argumentoi se bëhet fjalë për një organizatë në nivel të lartë të organizimit, duke vënë në dyshim paanshmërinë e ministrit në çështjet që lidhen me institucionet e drejtësisë dhe grupkapitullin e parë të negociatave.
Hoxha deklaroi se ka mbështetje të pakushtëzuar për organet e pavarura të drejtësisë, se SPAK bën punën e vet dhe se ai nuk diskuton vendimet e SPAK apo gjykatës. Ai theksoi se organet e drejtësisë janë vendosur me konsensus nga Parlamenti dhe kërkoi respektimin e prezumimit të pafajësisë për çdo person të përmendur në një hetim të bërë publik. Hoxha mohoi çdo përfshirje personale ose të familjes së afërt në dosjen në fjalë, duke theksuar se ka një familje të madhe dhe duke kundërshtuar “lincimin publik, fajësimin kolektiv” dhe “baltosjen përmes biografisë së keqe”, fenomene që, sipas tij, duhet të jenë të mbrapshta për shoqërinë.
Këlliçi po ashtu solli në diskutim publikimin, para 10 ditësh, të një mesazhi që ai verifikoi duke paraqitur foto dhe orarin e fshirjes së postimit dhe kohën kur Hoxha doli nga një grup ambasadorësh në WhatsApp, duke kërkuar sqarim dhe një qëndrim korrektues apo falje nëse mesazhet janë të vërteta. Hoxha u përgjigj se takimet me shqiptarët e Maqedonisë së Veriut shërbyen për të sqaruar se nuk ka arsye për shqetësim dhe se pozicionet e tij zyrtare nuk jepen përmes SMS, Signal apo WhatsApp, por vetëm përmes kanaleve zyrtare të autorizuara.
