Kryetarja e Komisionit të Apelimit në PD dhe kandidatja për deputete, Adriana Kalaja, deklaroi pas seancës gjyqësore se padia për shpifje ndaj saj nga Erion Veliaj është një përpjekje për të intimiduar atë dhe opozitën.
Ajo kërkoi që gjykata t’i kërkojë Veliajt një deklaratë nga paraburgimi, pasi statusi i tij ligjor ka ndryshuar. Kalaja theksoi se drejtësia duhet të marrë në konsideratë prova të rëndësishme, përfshirë dëshminë e kreut të SPAK, Altin Dumani.
Ajo ushpreh se në telefonin e një drejtori të kompanisë “5D” është gjetur një video orgjie që lidhet me festimet pas zgjedhjeve të 14 majit 2023. Kalaja e cilësoi këtë si një çështje serioze që kërkon transparencë dhe hetim të plotë. Ajo i bëri thirrje Veliajt të bashkëpunojë me drejtësinë dhe të dorëzojë vullnetarisht videon në fjalë.
Deklarata e Kalasë para SPAK:
Kjo ishte seanca e radhës, për një padi penale që ka bërë ai që sot ndodhet në burgun e Durrësit, ose siç quhet, shtetasi Erion Veliaj, ku më akuzon për shpifje për shkak të një deklarate që unë kam thënë në një nga protestat në Bashkinë e Tiranës.
Unë sot i kërkova gjykatës, në respektim të Kodit të Procedurës Penale, por edhe të praktikës së konsoliduar gjyqësore, që gjykata kryesisht t’i kërkonte Erion Veliajt një deklaratë në paraburgim, meqenëse ka ndryshuar statusi politik i tij, pra në kohën që ka ngritur padinë, ai ka qenë i lirë.
Pra nuk ka pasur masë sigurimi, ndërkohë që sot ai ndodhet me një masë sigurimi personal, dhe jo më kot ligji e parashikon këtë hap procedurial, mbase ai sot ka halle më të mëdha sesa çështja e videos së orgjive që ka bërë, dhe aq më shumë, as prokurorin as gjykatën nuk duhet ta trembi një kërkesë proceduriale, edhe për faktin që unë i kam kërkuar që një nga provat që duhet të vihet në këtë proces penal, duhet të jetë edhe deklarimi në rolin e dëshmitarit, të drejtuesit të SPAK Altin Dumani, i cili duhet të vijë dhe të deklarojë nëse është e vërtetë apo jo, se në telefonin e sekuestruar të një prej drejtorëve të kompanisë 5D, ose siç e quajmë ne të skemës 5D, është gjetur edhe video e orgjive, ose siç e festës që kanë bërë ata pas grabitjes që i bënë zgjedhjeve të 2023, të 14 maj 2023 në Bashkinë e Tiranës.
Kështu që, kjo është tentativa e radhës e Erion Veliajt, pasi ka vepruar në çdo rast duke intimiduar opozitën, dhe mua personalisht, për shkak se do të tregojë në publik se Adriana Kalaja është thjesht një shpifëse, unë e ftoj që ai të mendohet mirë aty tek ajo qelia e paraburgimit, të mendohet mirë për gjithë krimet dhe veprat penale që ka bërë dhe nuk e shpëton asnjë kërkesë penale, as 100 kërkesa penale, në formën e akuzës së shpifjes ndaj meje, por e vetmja mundësi që ai të lehtësohet sado pak nga ndëshkimi penal është që ai të bëhet i penduari i drejtësisë dhe me këtë rast mbase na sjell dhe videon e orgjisë në mënyrë vullnetare.
