Administrata publike po has vështirësi në rekrutimin e specialistëve të teknologjisë, me dhjetëra vende pune të paplotësuara në institucione të ndryshme, përfshirë Kryeministrinë dhe ministritë. Një vëzhgim në faqen e Agjencisë Shtetërore të Informacionit tregon njoftime të përsëritura për pozicione të ndryshme, mes tyre edhe në sektorin e inteligjencës artificiale.
Sipas ekspertit të IT-së Kushtrim Shala, konkurrenca për specialistët e teknologjisë nuk është më thjesht mes sektorit publik dhe atij privat në Shqipëri, pasi tregu i punës është globalizuar dhe profesionistët shqiptarë po marrin oferta nga kompani të huaja. Shala thotë se “Sot një i ri i certifikuar ka 3-4 oferta në tavolinë. Ka dy-tre kontrata dhe siguron të ardhura duke punuar hibrid.” Ai nënvizon se specialistë nga Tirana punojnë për kompani në Amerikë, Azi dhe Europë, duke e bërë konkurencën për burimet njerëzore një sfidë ndërkombëtare.
Eksperti thekson se Shqipëria vazhdon të jetë krah pune më i lirë, dhe kjo rrit kërkesën nga kompani të huaja, ndërsa administrata publike nuk ka të njëjtin fleksibilitet për të konkurruar për talentet. Edhe rritjet e pagave në administratë nuk konsiderohen të mjaftueshme për të tërhequr dhe mbajtur profesionistët e kualifikuar të teknologjisë. Përveç pagës, Shala vëren se rëndësi ka e gjithë paketa e motivimit, përfshirë trajnimin e vazhdueshëm dhe pjesëmarrjen në konferenca ndërkombëtare: “Paga nuk është elementi i vetëm, por ka të bëjë me paketën e motivimit. Trajnimi i vazhdueshëm, pjesëmarrja në konferenca ndërkombëtare.”
Për të përmirësuar situatën, Shala rekomandon krijimin e mundësive për talentet e reja në tregun digjital dhe thekson nevojën për investim dhe zhvillim të burimeve njerëzore që administrata ka aktualisht. Ai fokusohet jo vetëm te rekrutimi, por edhe te investimi në aftësitë dhe zhvillimin profesional të stafit ekzistues, si pjesë e paketës motivuese që mund të ndihmojë në tërheqjen dhe mbajtjen e specialistëve të teknologjisë brenda sektorit publik.
Top Channel
