Abrashi nuk ia del, ja si pritet të rreshtohet Shqipëria ndaj Spanjës

Kombëtarja shqiptare ka zhvilluar dje seancën e radhës stërvitore në ditën e tretë të grumbullimit në Barcelonë, ku po përgatitet për ndeshjen miqësore ndaj Spanjës.

Si zakonisht ekipi dhe stafi kuqezi kanë mbërritur në orën 16:00 në qendrën stërvitore për të zhvilluar seancën e ditës në kushte atmosferike mjaft të mira.

Grupi është fokusuar një pjesë të mirë të kohës në ngarkesat fizike e më pas ka punuar me pjesën taktike, duke zhvilluar edhe ndeshje kontrolli mes dy grupeve ku janë aktivizuar të gjithë futbollistët.

Ndërkaq, Departamenti i Komunikimit në FSHF bën me dije se është e sigurt mungesa e Amir Abrashit, i cili nuk mund të rikuperohet dot në kohë për dy ndeshjet e marsit për shkak të dëmtimit muskulor.

Grupi do të vazhdojë me të njëjtin program stërvitor edhe sot, ndërsa nesër kuqezinjtë do të zhvillojnë seancën zyrtare stërvitore në stadiumin e ndeshjes “RCDE” në Barcelonë.

Formacioni i mundshëm: 5-3-2: Berisha, Balliu, Ismajli, Gjimshiti, Kumbulla, Hysaj, Bare, Asllani, Gjasula (Laçi), Broja, Uzuni (Manaj)