Aleanca për Ardhmërinë e Kosovës (AAK) u shpreh e gatshme të ndihmojë Lëvizjen Vetëvendosje (VV) në formimin e institucioneve të reja, por pa synuar bashkëqeverisje. Kryetari i partisë, Ardian Gjini, sqaroi se mbështetja e shtatë deputetëve të Aleancës do të vijë vetëm nëse plotësohen disa kushte konkrete që ai i paraqiti si domosdoshmëri për të marrë pjesë në proceset vendimmarrëse.
Gjini tha se AAK nuk dëshiron të jetë pjesë e qeverisjes së VV-së: “Nuk kanë nevojë me na thirrë, për shkak se nuk kanë pse me na thirrë, sepse nuk duam të jemi pjesë e qeverisjes së Lëvizjes Vetëvendosje… Kom me i thanë: prano gazin amerikan, nise procesin e termocentralit, ngrite pragun e TVSH-së, hiqe tatimin në pronë për bujqit, ule inflacionin, kryje infrastrukturën e nisur, mos fol për hekurudha e mos me e buxhetu asnjë cent”. Ai theksoi se, nëse këto kushte respektohen, Aleanca do të marrë pjesë në seancën për zgjedhjen e presidentit, e cila kërkon 80 deputetë për kuorum.
Kryetari i AAK-së shtoi gjithashtu se partia nuk do të pengojë formimin e institucioneve dhe se, në rast nevoje për kuorum, do ta sigurojë atë, por pas një zotimi të pastër me shkrim që veprimet e kërkuara do të ndërmerren: “Nuk do ta pengojmë formimin e institucioneve në asnjë mënyrë. Nëse ka nevojë për kuorum, do ta bëjmë kuorumin, por na duhet një zotim i pastër me shkrim që këto veprime do të ndërmerren”.
Gjini shprehu shqetësim se VV mund të mos arrijë marrëveshje me asnjë parti dhe vendi të shkojë sërish në zgjedhje, dhe për këtë arsye AAK nuk e vendos si kusht zgjedhjen e Ramush Haradinajt për president, edhe pse e konsideron nder në rast të propozuar: “Nëse Ramush Haradinaj do të propozohej si president, për ne do të ishte nder, por nuk jemi duke e vendosur si kusht”.
Kreu i Aleancës, i zgjedhur para 7 qershorit, tha se deri tani nuk ka pasur diskutime me asnjë parti. Lëvizja Vetëvendosje ka deklaruar se do të presë certifikimin e rezultatit para nisjes së bisedimeve. Nga zgjedhjet e fundit, VV mori 53 deputetë, Partia Demokratike e Kosovës 22, Lidhja Demokratike e Kosovës 18 dhe Aleanca 7.
