Një fotografi e bërë nga roveri Curiosity më 20 gusht 2023 ka ringjallur debatet rreth mundësisë së ekzistencës së jetës në Mars. Në imazh shfaqet një formë e vogël që në pamje të parë duket si me trup dhe dy këmbë të holla; megjithatë, në foto të tjera të marra më pak se një minutë më parë kjo formë nuk duket, çka ngre pyetje mbi origjinën e saj dhe pamundësinë për të përcaktuar nëse ka pasur lëvizje apo nëse bëhet fjalë për një artefakt imazhi. Fotografia u bë sërish virale në rrjetet sociale, ku përdorues të ndryshëm propozuan hipoteza të ndryshme: disa e përshkruan si “kandil deti” ose një objekt të ngjashëm me UFO, të tjerë sugjeruan defekt të kamerës, efekt optik apo një element të terrenit marsian.
Studiuesi Jean Ward shpërndau imazhin duke e cilësuar formën si një objekt në formë kandili deti. Komentuesit në rrjet e kanë krahasuar edhe me një dordolec ose me një “tripod”, por nuk ekzistojnë prova që figura të jetë një krijesë ose formë jete jashtëtokësore. Fakti që objekti nuk shfaqet në imazhe të tjera të së njëjtës zonë e bën të pamundur konfirmimin përmes fotografive nëse është objekt i lëvizshëm apo vetëm një artefakt i regjistrimit.
Curiosity ndodhet në Mars që prej vitit 2012 dhe një nga objektivat kryesore të misionit është përcaktimi nëse planeti ka pasur dikur kushte të përshtatshme për jetë mikrobike. NASA thekson se kërkimi lidhet kryesisht me gjurmët e jetës së lashtë mikrobike, jo me zbulimin e krijesave të gjalla në sipërfaqe. Ndërkohë, misioni i roverit Perseverance ka sjellë rezultate më konkrete: në shtator 2025, NASA njoftoi se një mostër shkëmbi e marrë nga një shtrat i lashtë lumi në kraterin Jezero përmban “biosignatura potenciale” — shenja që mund të kenë origjinë biologjike, por që kërkojnë studime të mëtejshme për të konfirmuar ose përjashtuar lidhjen me jetën.
Pra, ndërsa figura misterioze në imazhin e Curiosity vazhdon të ngjallë teori në internet, ajo nuk përbën dëshmi për jetë në Mars dhe mbetet një objekt i paqartë në një fotografi të sipërfaqes së Planetit të Kuq. (Top Channel)
