Mbrëmjen e së premtes që sapo lamë pas, “legjionarët” e Kombëtares sonë arritën të shkruajnë sërish historinë, kësaj radhe në “Zimbru Stadium” të Moldavisë, ku barazimi, 1 me 1, ndaj këtyre të fundit u mjaftoi “shqiponjave” për të siguruar një vend në fazën e grupeve të Kampionatit Evropian të futbollit, Euro 2024, që do të zhvillohet vitin e ardhshëm nga 14 qershori deri në 14 korrik, në Gjermani.
Padyshim protagonist absolut në këtë arritje është edhe “mister” Sylvinho, me teknikun brazilian, që në vetëm 7 ndeshje arriti të na dërgojë në kompeticionin më të rëndësishëm për futbollin e Kombëtareve, në Evropë, falë grintës dhe harmonisë që i dhuroi “legjionarëve” tanë, pa llogaritur këtu zbulimet dhe perfeksionim e lojtarëve.
Mirëpo, përveç nesh i lumtur, duket të jetë edhe vetë tekniku brazilian, i cili e konsideron kualifikimin, si një “lumturi e krenari të madhe”, ndërsa më tej, një postim në profilin e tij zyrtar, në Instagram shprehet tepër falenderues për gjithçka, që nga futbollistët, stafin teknik, drejtuesit e Federatës, tifozët, si dhe për familjen e tij.
Postimi i plotë i teknikut Sylvinho:
Lumturi dhe krenari e madhe. Sigurimi i një vendi në EURO 2024 është padiskutim realizimi i ëndrrës së shumë njerzve, ëndrrës së një Kombi. Pjesëmarrja në një moment të tillë gëzimi për popullin shqiptar është një burim i jashtëzakonshëm kënaqësie.
Faleminderit e mija shkojnë për shumë njerëz: për futbollistët, të cilët kuptuan dhe mbështetën idetë tona dhe gjithmonë luajtën me shpirt dhe zemër.
Për pjesëtarët e stafit teknik dhe administrativ, të cilët punuan intensivisht dhe u kujdesën për çdo detaj gjatë të gjithë këtij rrugëtimi.
Për drejtuesit dhe punonjësit e Federatës, që kanë bërë gjithçka që puna jonë të bëhej në perfeksion.
Për fansat, për mbështetjen e tyre jetike brenda dhe jashtë shtëpisë tonë.
Për familjen time, që janë baza e gjithçkaje që bëj dhe më japin mbështetje që të bëj punën time me dashuri dhe dedikim!
Për këdo që direkt apo indirekt ka qënë pjesë e kësaj historie të mrekullueshme.
Euro 2024 është këtu tani.
