Sot KQZ ka caktuar ndarjen e komisionerëve për zgjedhjet e pjesshme në Kukës më 24 shtator.
Ilirian Celibashi, u shpreh se mbi bazën e rezultatit të 14 majit, Partia e Lirisë rezulton ajo që ka marrë më shumë vota në kampin opozitar dhe i takojnë 2 komisionerë në KZAZ.
Ndërkohë PD renditet forcë e dytë dhe do të ketë 1 komisioner. Ndërkohë 3 të tjerë i takojnë PS si partia më e madhe në mazhorancë.
“Ky si subjekt (PL) ka një numër votash të tillë që e bën atë të pretendojë të drejtë për të propozuar anëtarët e KZAZ si parti politike e opozitës që ka marrë më shume vota në zgjedhjet vendore”, deklaroi Ilirjan Celibashi, Komisioneri Shtetëror i Zgjedhjeve.
Në deklaratën e tij z.Kthupi shprehet se tentativa e z.Celibashi është tentativa e radhës, për zbatimin e projektit të Sali Berishës, që synon transferimin e votave të demokrateve tek Partia e Ilir Metës.
Z.Kthupi shton më tej se Partia Demokratike do të vazhdojë betejën e saj për të mbrojtur votën e çdo demokrati si në kontekstin politk dhe në rrafshin ligjor.
DEKLARATË E KËSHILLTARIT LIGJOR TË PD, REZART KTHUPI
Tentativa e sotme e Zotit Celibashi është tentative e radhës, pas atyre te zgjedhjeve të 14 majit, për zbatimin e projektit politik të Sali Berishës, që synon trasnferimin e votave të demokrateve tek Partia e Ilir Metës. Nëse me 14 maj u përdorën politikisht votat e domakratëve për të zgjedhur kandidatët e Ilir Metës sot u tentua që këto vota t’i jepen këtij të fundit edhe ligjërisht duke patur përfaqësim të komisionerëve në numër më të madh se PD.
Partia Demokratike do të vazhdojë betejën e saj për të mbrojtur votën e cdo demokrati si në kontekstin politik por dhe në rrafshin ligjor. Çdo përpjekje për të deformuar vullnetin e demokratëve me bekimin e zgjatimeve të PS në KQZ do të kontestohet nga ne në rrugë ligjore. Nuk do të lejojmë që votat e demokratëve të jenë mburojë për interesat personale të askujt dhe që ato të shërbejnë si themel për kullat e opozitës partnere me Edi Ramën.
