Është ekzekutuar nga forcat RENEA Ramiz Muçollari, 62-vjeçari nga Maliqi i cili pasi plagosi gruan dhe djalin, hapi zjarr ndaj policisë dhe nuk pranoi të dorëzohej.
Burime nga vendi i ngjarjes bëjnë me dije se ka pasur herë pas here shkëmbime zjarri mes 62 vjeçarit dhe forcave RENEA. Ajo çka konfirmohet nga informacionet paraprake është se RENEA, e vënë në pozitë të vështirë nga të shtënat me kallash nga autori, ka qëlluar drejt tij duke e lënë të vdekur në vend.
Grupi i ekspertëve është duke bërë kqyrjen e vendit të ngjarjes ndërkohë që bashkëshortja dhe i biri ndodhen në spitalin e Korçës me plagë të marra në kokë dhe pjesë të tjera të trupit, por ndodhen jashtë rrezikut për jetën.
Gazetarja e ‘FaxNews’, Iris Rezhda raporton se familjarët e autorit po ruhen me polici në dhomën e spitalit, nuk lejohej asnjë komunikim me të dëmtuarit pasi janë edhe në gjendje të traumatizuar. Të dy janë të shtruar në kirurgji aty ku po marrin mjekimin e nevojshëm.
Ramiz Muçollari vuan nga probleme të shëndetit mendor, dhe prej 20 vitesh trajtohet me ilaçe.
Policia bëri me dije se gjatë ditës së djeshme ka qenë për vizitë me familjarët në spitalin psikaitrik, por nuk është shtruar në spital, dhe në mbrëmje kur janë kthyer në banesë ka nisur konfliktin me familjarët.
Kujtojmë se pas orësh thirrje të vazhdueshme të policisë për t’u dorëzuar, Muçollari nuk ka pranuar dhe ka qëndruar i mbyllur dhe i armatosur brenda banesën e tij. RENEA arriti që të futet në banesë, ndërsa autorit dyshohet se fshihej në papafingo.
Muçollari, 62 vjeç, ka plagosur orët e para të mëngjesit të sotëm me thikë në këmbë bashkëshorten e tij Pëllumbesha Muçollari, 58 vjeçe, si dhe ka goditur me sende të forta në kokë djalin e tij Kamber Muçollari, 27 vjeç.
