Fredi Kokoneshi, kryetar i Bashkisë së Divjakës dhe shoferi i tij Gazmend Bullari, janë plagosur me thikë në mes të qytetit këtë të premte. Autori është ndaluar nga Policia dhe mësohet se është shtetasi Erges Xhelili, ish-punonjës i IT në Bashkinë e Divjakës.
Këtë të premte Kokoneshi është përballur me Xhelilin në qendër të qytetit, pranë Qendrës Shëndetësore të Divjakës, dhe kanë pasur një debat me tone të ashpra. Shkaqet nuk dihen ende, pasi ngjarja ka ndodhur vetëm pak minuta më parë.
Erges Xhelili gjatë debatit ka nxjerr thikën që mbante me vete dhe ka qëlluar kryebashkiakun socialist Fredi Kokoneshi. Menjëherë ka ndërhyrë shoferi i këtij të fundit, shtetasi Gazmend Bullari, i cili po ashtu ka marrë plagë të shumta.
Ish-punonjësi i IT në Bashkinë e Divjakës është larguar nga vendngjarja por Policia ka mundur ta arrestojë atë.
Ndërkohë, Fredi Kokoneshi është dërguar me urgjencë në Spitalin e Lushnjës, ku raportohet se ndodhet në gjendje të stabilizuar shëndetësore dhe nën kujdesin e mjekëve. Ndërkohë, shoferi i tij ka marrë plagë të shuma dhe për rrjedhojë ndodhet në gjendje më të rëndë shëndetësore.
