Kryeministri i ri i Mbretërisë së Bashkuar, Rishi Sunak, pati telefonatën e tij të parë zyrtare me Presidentin francez Emmanuel Macron të premten, vetëm pak ditë pas marrjes së detyrës.
Sunak tha se lidhjet me Francën “shtrihen në shekuj” dhe vuri në dukje se të dy vendet bashkëpunojnë ngushtë për një sërë çështjesh, që nga Ukraina te siguria e energjisë.
“Kryeministri theksoi rëndësinë që të dy vendet ta bëjnë rrugën e Manshit plotësisht të pakalueshme për trafikantët e qenieve njerëzore. Udhëheqësit u zotuan të thellojnë partneritetin e tyre për të mos lejuar kalimet vdekjeprurëse të Kanalit, nga ku përfitojnë kriminelët e organizuar,” tha Downing Street në një deklaratë.
Pala franceze deklaroi “disponueshmërinë” e Macron për të “thelluar marrëdhëniet dypalëshe midis Francës dhe Mbretërisë së Bashkuar, veçanërisht në fushat e mbrojtjes, çështjeve strategjike dhe energjisë”.
Qeveria britanike tashmë po ndihmon financiarisht autoritetet franceze për të monitoruar më mirë bregdetin francez për të parandaluar nisjet.
Por sipas gazetës The Times, kryeministri britanik Rishi Sunak dëshiron të shkojë më tej. Ai kërkon një marrëveshje me objektiva për varkat që pikasen, një numër minimal agjentësh francezë të caktuar për të monitoruar plazhet dhe roje kufitare britanike për t’i shoqëruar ato.
Nga ana britanike, ai synon të vendosë objektiva që 80% e kërkesave për azil të shqyrtohen brenda gjashtë muajve, krahasuar me një mesatare prej 480 ditësh, duke forcuar kushtet për dhënien e azilit.
Numri rekord i kalimeve të Kanalit
Më shumë se 38,000 emigrantë kanë bërë kalimin e rrezikshëm të Kanalit Anglez me varka të improvizuara që nga fillimi i vitit, më shumë se në të gjithë vitin e kaluar, që ishte tashmë një rekord. 308 të tjerë mbërritën të enjten.
Sipas autoriteteve britanike, deri në 80% e këtyre emigrantëve të rinj tashmë janë shqiptarë.
Sistemi britanik i azilit është i mbingarkuar nga fluksi, me më shumë se 117,000 çështje në pritje. Qendra e pritjes ku supozohet se emigrantët do të përpunohen për 24 orë pas mbërritjes është e stërmbushur me njerëz që kanë qenë atje për më shumë se 30 ditë ose që flenë në dyshekë kampingu.
Qeveritë e njëpasnjëshme konservatore kanë marrë në konsideratë gjithçka, duke hequr dorë nga disa ide të paligjshme ose të papërshtatshme, të tilla si shtyrja e anijeve nga ujërat britanike me valë artificiale, mbyllja e emigrantëve në kroçera ose dërgimin e tyre në ishuj të largët.
