I ftuar në studion e “Fax News”, Sekretari i Përgjithshëm i PL-së Tedi Blushi foli mbi përgatitjen e Partisë së Lirisë për zgjedhjet vendore dhe aksionin e opozitës në terësi.
Blushi theksoi se keqqeverisja dhe kriza e rëndë ekonomike ka prekur çdo qytetar, pavarësisht krahut politik. Ai shtoi se Partia e Lirisë po bën një punë të përditshme organizative dhe numri i anëtarëve sa vjen e shtohet.
Pjesë nga intervista në studio:
-Pyetje: Vini direkt nga takimi në njësinë nr.9 ku jeni deleguar për zgjedhjet, si e shikoni situatën?
-Blushi: Situata në terren, nuk dua ta ekzagjeroj nëse do e cilësoja si shpërthyese sepse pakënaqësia e qytetarëve të Tiranës ka arritur majat, jo vetëm për shkak të keqqeverisjes në dy mandate edhe e bashkisë së Tiranës. Sapo vij nga një takim tek njësia 9 ku jam i deleguar, sepse siç e dini PL ka filluar organizimin kapilar, po zgjerohemi në çdo lagje të Tiranës, po bëjmë një punë të përditshme organizative dhe jo vetëm, numri i anëtarëve por edhe qytetarëve që janë pa parti shtohet.
-Pyetje: Komponentët që kanë mbështetur prej vitesh mazhorancën, a ka prej tyre që i janë bashkuar kauzës tuaj?
-Blushi: Keqqeverisja ndihet dhe te militantët e PS-së, kriza e çmimeve ka kapur të gjithë shqiptarët, kriza e rëndë nuk njeh dallime politike, sigurisht nuk janë vetëm anëtarët e opozitës që e ndjejnë vjedhjen në xhepat e tyre. Kjo qeveri e pashpirt çdo ditë vjedh qytetarët.
Pyetje: Meta ka deklaruar se në zgjedhjet e ardhshme ju do të përfaqësoheni me kandidat të përbashkët me PD-në, si do arrihet konsensusi për një emër?
Blushi: Meta ishte i qartë, ideja e hedhur prej tij do të maksimizonte votat në zgjedhje, sepse vetëm me një kandidat të përbashkët të gjithë faktorët opozitarë është alternativa më e mirë, sigurisht mos të harrojmë që çdo forcë politike do të ruajë individualitetin e vet dhe PL do ketë një përfaqësim dinjitoz në parlamentet vendore. U bëj thirrje qytetarëve, monitoroni sahatet e energjisë elektrike sepse patronazhisttë mund të manipulojnë faturat. Nëse prokuroria do të merrte masa një vit më parë nuk do ndodhte skandali i fundit i hakerimit sepse Rama ka nxjerrë në treg të hapur të gjithë të dhënat e shqiptarëve.
Pyetje: Si do arrini të mundni atë që është cilësuar si makineri votash, mazhorancën?
Blushi: Kjo nuk është mazhorancë, Edi Rama në vlerësimin tonë ka rënë, ai qëndron në pushtet sepse ai kishte kapur lidershipin e opozitës.
Nëse opozita nuk do digjte mandatet dhe të tërhiqej nga gara e pushtetit vendor, Rama s’do ishte sot kryeministër.
(E.D/faxweb.al)
