Në selinë e Partisë Demokratike ka nisur çbunkerizimi. Nga dita e sotme ka nisur heqja e dyerve të blinduara dhe fortifikimeve që u vendosën nga Lulzim Basha në muajin dhjetor të 2021, si një tentativë e tij, për të mbrojtur selinë nga ata që i konsideroi dhe i trajtoi si “pushtues” të selisë, edhe pse deri në 9 shtator 2021 ndante çdo aksion politik.
Një ditë më parë, në Kryesinë e PD, deputetët që vijojnë të jenë ende si pjesë e Partisë që mban vulën dhe selinë, kërkuan nga Enkelejd Alibeaj që të çbunkerizonte selinë.
Sigurisht që nga selia do të jenë larguar edhe bombulat me gaz apo fikset e zjarrit që u përdorën kundër demokratëve më 8 janar, kur Komisioni i Rithemelimit tentoi të hynte në seli, në një tentativë për të zbatuar vendimet e Kuvendit të 11 dhjetorit 2020 dhe referendumit të anëtarësisë së 18 dhjetorit, që shkarkoi Lulzim Bashën dhe të gjithë kupolën drejtuese të PD, nga funksionet.
Tentativa për marrjen e selisë dështoi, kjo pasi disa qindra demokratë u përballën me një sulm me gaz lotsjellës dhe fikset e zjarrit, por edhe me dhunën policore, e cila u kërkua si ndihmë nga ata që ndodheshin brenda selisë.
