Ka vijuar në GJKKO seanca për dosjen “Partizani” me dëshmitë e katër personave të thirrur nga Prokuroria: Justina Boriçi, Fatmir Mediu, Maksim Malaj dhe Vladimir Qirjazi.
Justina Boriçi, ish-drejtoreshë e kthimit dhe kompensimit të pronave, deklaroi se emërimi i saj në këtë detyrë ishte bërë nga ish-kryeministri Sali Berisha, pa diskutime paraprake lidhur me çështjen objekt gjykimi. Ajo tha se nuk ishte njohur me asnjë ankesë për pronat në fjalë dhe se Berisha nuk kishte ndërhyrë për kthimin e pronave. Boriçi sqaroi se zyra rajonale Tiranë e kishte çështjen dhe se emërimi i saj ishte një procedurë normale pasi drejtoria varej nga kryeministri.
Ish-ministri i Mbrojtjes, Fatmir Mediu, deklaroi se klubi “Partizani” nuk kishte qenë në interes të ministit dhe se dikasteri nuk kishte kompetenca mbi “çështjen e planit të përhapjes”, që sipas tij varej nga Shtabi i Përgjithshëm. Mediu tha se ministri firmoste shkresa, por nuk i përpilonte ato, pasi përmbajtja i përkiste strukturave përkatëse. Ai përmendi se procedurat për privatizimin kishin nisur që në qeverinë e mëparshme, duke përmendur korrespondencën e vitit 2002 të firmosur nga ish-ministri Anastas Angjeli dhe dërgimet nga Genc Ruli. Mediu u shpreh mbështetës i ligjeve në interes të pronarëve dhe kundërshtar i ligjeve kundër tyre, duke thënë se pronat jashtë planit të përhapjes administroheshin nga strukturat e Ministrisë së Mbrojtjes me Shtabin e Përgjithshëm. Ai pretendoi se për pronën në fjalë kishte pasur pretendime për uzurpim të paligjshëm dhe se reduktimi i ushtrisë kishte bërë që shumë prona të mos menaxhoheshin, disa duke u privatizuar ose kthyer pronarëve.
Vladimir Qirjazi, ish-komandant i forcës mbështetëse, tha se në mars 2009 ishte njohur me urdhrin e ministrit Gazmend Oketa për firmosjen e dokumentacionit për shitjen e klubit, por ai kundërshtoi pasi struktura që drejtonte nuk kishte lidhje me pronën. Qirjazi deklaroi se i kishte dorëzuar dokumentacionin me vulë dhe se raportet e Drejtorisë së Antikorrupsionit nuk kishin trajtuar pretendimet e tij. Ai tha se kërkoi takim me presidentin Bamir Topi dhe mori urdhër “vijo dhe zbato ligjin”, si dhe se ministri i kishte kërkuar të firmoste duke i thënë se edhe atij po i kërkonin. Maksim Malaj dëshmoi gjithashtu në seancë.
