Numërimi mbrapsht për natën e Halloween-it ka nisur dhe të gjithë sytë janë te Heidi Klum, e cila prej vitesh konsiderohet “mbretëresha” e maskimeve. Me festën që organizon që nga viti 2000, ajo ka kthyer kostumin e Halloween-it në një nga momentet më të pritura të vitit për fansat dhe botën e showbiz-it.
Këtë vit Klum ka vendosur të mbajë të fshehtë identitetin e personazhit që do të interpretojë, por ka publikuar një fotografi enigmatike dhe të frikshme që ka nxitur spekulime në rrjetet sociale. “Cila është veshja ime? Edhe një javë”, shkruante modelja në mbishkrimin e fotos, duke i ftuar ndjekësit të përpiqen të zbulojnë surprizën e saj.
Sipas Just Jared, kostumet e Heidi Klum dallohen për detaje të jashtëzakonshme, realizim të ndërlikuar dhe transformime mbresëlënëse, për të cilat ajo kalon orë të tëra në punë me specialistë të grimit dhe efekteve speciale. Fotografia e publikuar ka nxitur teori të ndryshme: disa përdorues mendojnë se koncepti mund të lidhet me botën nënujore, duke u bazuar në elementet e dukshme në imazh; të tjerë sugjerojnë frymëzim nga kultura moderne pop, përmendin serialin “The Last of Us” ose filmin “The Substance”.
Derisa Klum nuk ka dhënë detaje që të konfirmojnë personazhin e ri, përgjigjja pritet të zbulohet në festën e saj tradicionale të Halloween-it, ku çdo vit ajo surprizon me transformime të pazakonta.
Vitin e kaluar Heidi Klum tërhoqi vëmendjen me një kostum spektakolar të frymëzuar nga Meduza e mitologjisë greke: ishte e mbuluar me luspa të gjelbra dhe një bisht pothuajse 2.5 metra të gjatë. Një element i veçantë ishin gjarpërinjtë në flokët e saj, që dukeshin në lëvizje, ndërsa lentet speciale të kontaktit i jepnin syve pamje të frikshme. Pranë saj ishte bashkëshorti Tom Kaulitz, i maskuar si një ushtar i lashtë grek i shndërruar në gur, referencë ndaj mitit të Meduzës.
Me një histori të gjatë transformimesh të jashtëzakonshme, pritshmëritë për kostumin e ri të Heidi Klum janë sërish të larta. Mbetet për t’u parë nëse këtë vit ajo do të zgjedhë një personazh nga mitologjia, një krijesë fantastike apo një frymëzim nga filmat dhe serialet e njohura.
