Belgjika ka shtyrë hyrjen në fuqi të ndalimit të planifikuar të pirjes së duhanit në tarracat e kafeneve, restoranteve dhe hapësira të tjera publike të jashtme. Masa, që pritej të hyjë në fuqi më 1 janar 2027, do të vonohet pas kërkesave për rishikimin e disa dispozitave të saj. Sipas raportimit të Politico, Këshilli i Shtetit ka kërkuar përshtatjen e disa masave të parashikuara, dhe zyra e ministrit të Shëndetësisë, Frank Vandenbroucke, konfirmoi për transmetuesin belg VRT se autoritetet po punojnë për të bërë ndryshimet e kërkuara. Nuk është bërë e ditur se sa do të zgjasë shtyrja dhe kur ndalimi mund të hyjë në fuqi.
Nisma qeveritare kishte shkaktuar reagime nga sektori i gastronomisë, me pronarë kafesh dhe restorantesh që shprehën shqetësime për ndikimin në aktivitetin e tyre. Shtyrja pritet t’u japë bizneseve më shumë kohë për t’u përgatitur për ndryshimet e parashikuara. Belgjika nuk është e vetme në Evropë që po shqyrton zgjerimin e kufizimeve për pirjen e duhanit në ambientet e jashtme: Franca ka vendosur ndalime në disa hapësira publike, përfshirë plazhet, parqet dhe zonat pranë shkollave, ndërsa Spanja miratoi në korrik një projektligj që synon zgjerimin e ndalimit në tarracat e jashtme dhe hapësira të tjera publike, si dhe parashikon kufizime për cigaret elektronike. Projekti spanjoll është përballur me kundërshtime nga përfaqësues të sektorit të restoranteve.
Vitin e kaluar Belgjika miratoi masa kundër pirjes së duhanit që përfshijnë kufizime në zonat e aeroporteve dhe ndalimin e cigareve elektronike me aromë. Qeveria belge synon të krijojë një “brez pa duhan” deri në vitin 2040. Sipas të dhënave të cituara në raportim, pothuajse një në katër belgë pi duhan, dhe rreth 19% e popullsisë e konsumon atë çdo ditë.
