Sipas degës së Partisë Demokratike në Vlorë, rreth 330 persona janë regjistruar paraprakisht për të marrë pjesë në protestën që thirret sot nga PD në Tiranë. Nga degët e Partisë Demokratike në Selenicë dhe Himarë pritet të nisen edhe rreth 80–100 persona të tjerë. Burimet nga PD Vlorë shtojnë se nuk ka një organizim të mirëfilltë me transport të përbashkët; pjesëmarrësit janë regjistruar më parë në degë dhe më pas janë nisur drejt kryeqytetit kryesisht me automjete personale. Për personat që nuk kishin mundësi transporti është bërë koordinimi për t’u bashkuar me mjete të pjesëmarrësve të tjerë.
Sipas të njëjtave burime, pjesëmarrja nga Vlora rezulton rreth 100 persona më e lartë krahasuar me protestat e mëparshme. Risi këtë herë është edhe regjistrimi i qytetarëve që nuk janë pjesë e strukturave të Partisë Demokratike, por kanë shprehur dëshirën për t’u bashkuar protestës. Nisja nga Vlora është parashikuar gjatë intervalit 07:00–08:00 të mëngjesit të së shtunës.
Një pjesë e konsiderueshme e pjesëmarrësve pritet që pas protestës së PD-së t’i bashkohet edhe protestës së studentëve që do të zhvillohet në Tiranë. Informacionet e përmendura mbi numrat dhe organizimin vijnë nga dega e PD-së në Vlorë dhe burimet e saj lokale lidhur me mënyrën e regjistrimit dhe lëvizjen drejt kryeqytetit.
