Ish-deputetja e PD-së Rudina Hajdari u ka bërë thirrje studentëve dhe protestuesve të pranojnë dialogun me kryeministrin Edi Rama, duke e lidhur thirrjen me një model historik: takimin e përfaqësuesve të Lëvizjes Studentore të Dhjetorit 1990 me Ramiz Alinë. Në statusin e saj ajo publikoi një fotografi nga takimi i dhjetorit 1990, ku Azem Hajdari dhe përfaqësues të tjerë studentësh u ulën përballë Alisë për të diskutuar kërkesat e tyre. Rudina citon shembullin e të atit dhe kërkon që dialogu të pranohet, por me transparencë: “Uluni në dialog, por me transparencë, jo pas dyerve të mbyllura. Mos i humbni këto mundësi! Unë do të ulesha e para në ato karrige dhe do të përballesha drejtpërdrejt me Ramën. Ai nuk ka si të mbrohet përballë argumenteve tuaja. I keni të gjitha argumentet për të arritur maksimumin e kërkesave tuaja”.
Mesazhi i Rudinës lidhet me atë që ndodhi 36 vite më parë, kur Azem Hajdari ishte një nga drejtuesit e Lëvizjes Studentore të Dhjetorit 1990 dhe përfaqësuesit kërkonin ndër të tjera formimin e pluralizmit politik. Në dokumentet e takimit, Azem Hajdari e konsideronte dialogun si mënyrë për të mbrojtur kërkesat e studentëve dhe jo si tërheqje prej tyre, duke sugjeruar që të regjistrohej dhe të transmetohej për të siguruar transparencë dhe për t’i lejuar studentët të ndiqnin procesin: “Prandaj neve jemi të kënaqur që pranuat dialogun, pavarësisht se u krijuan disa vështirësi për me ardhë tek dialogu… Shokët studenta më kanë thënë që t’ju kërkoj, sipas mundësive të juaja, që ky dialog, duke pasur parasysh, të inçizohet dhe ta transmetojmë dhe ta ndigjojnë studentët”.
Azem Hajdari shpjegonte gjithashtu se programi i paraqitur ishte diskutuar dhe miratuar me studentët, dhe përfaqësuesit prisnin të mbronin mandatin e marrë, duke qenë të autorizuar “të hyjmë në dialog për këtë program” dhe të paraqisnin argumentet për çdo pikë. Ai theksonte rëndësinë e këmbënguljes në proceset demokratike, duke vënë theksin te durimi i kombinuar me insistimin për realizimin e kërkesave të paraqitura. Rudina përmend fjalët e të atit si argument pse studentët nuk duhet të refuzojnë tryezën, dhe paralajmëron: “Nuk ka njeri më trim se Azem Hajdari, edhe ai u përball me diktaturën. Nëse nuk uleni ju, dikush tjetër do ta bëjë dialogun në kurrizin tuaj”.
