Kryetari i Partisë Demokratike, Sali Berisha, akuzoi kryeministrin Edi Rama se po e çon vendin drejt një konflikti të gjerë përmes dhunës ndaj studentëve dhe protestuesve dhe kërkoi dorëheqjen e tij. Në konferencën për media ai bëri thirrje që qytetarët, bizneset e vogla dhe shërbimet publike t’i bashkohen revoltës studentore dhe të mbështesin grevën në qytete si Mati, Tropoja, Kurbini, Korça, Vlora dhe Jugun. Berisha pretendoi se janë mbi 150 të ndaluar gjatë protestave dhe i përshkroi autorët e arrestimeve si “narkobanda me uniformë”.
Ai akuzoi policinë dhe forcat e sigurisë se kanë përdorur dhunë ndaj studentëve, përfshirë thyerje xhamash, përdorim sprajsh ndaj vajzave në konvikte dhe përdorim forcash për të terrorizuar. Sipas tij, në spitalet e vendit trajtohen protestues me plagë serioze, përfshirë kafkë të shpuar nga plumbi, hematoma të mëdha dhe lëndime të tjera. Berisha tha se ekzistojnë incizime nga dhoma në lokale të paidentifikuara ku duken dhjetëra studentë të goditur dhe të lënë përtokë.
Partia Demokratike i bëri thirrje bizneseve të vogla të shprehin solidaritet, edhe përmes ndërprerjeve të përkohshme të punës, dhe garantoi se studentët nuk kanë urrejtje ndaj tyre. Sipas Berishës, urrejtja është kundër “Padrinos” dhe oligarkëve, ndërsa biznesi i ndershëm duhet të mbështesë studentët. Ai i quajti strukturat shtetërore të Edi Ramës “narkoshtet” dhe akuzoi qeverinë për mbështetje ndaj regjimit që, sipas tij, është armiku kryesor i shqiptarëve.
Berisha denoncoi vendimet e marrë nga një gjykatëse që, sipas tij, ishte në konflikt interesi dhe duhej të refuzonte vlerësimin e masave ndaj studentëve. PD informoi se ka organizuar shërbim avokatie falas për të ndaluarit dhe se deputetët e saj janë në komisariate për mbrojtje dhe mbështetje të studentëve. Ai po ashtu akuzoi Edi Ramën për korrupsion, duke pretenduar se kanë vjedhur mbi 12 miliardë euro përmes tenderave, prokurimeve e koncesioneve, dhe se në 10 vite janë larguar mbi 47% e shqiptarëve.
