Prej orës 09:00, dita e tretë e protestës në Tiranë u shoqërua sërish me akte dhune dhe përplasje. Protestues të maskuar sulmuan me gurë, sende të forta dhe fishekzjarrë institucione dhe policinë, ndërsa u plaçkiten dhe u dëmtuan banka, biznese dhe kioska në rrugët e kryeqytetit. Përplasjet më të forta u regjistruan te Kryeministria, ku tensionet zgjatën rreth një orë e gjysmë dhe efektivët ndërhynë me gaz lotsjellës dhe autobotë uji për të shpërndarë grumbullimet; nga incidentet mbetën të lënduar 26 persona, ndërsa një efektiv policie nga Durrësi dhe një nga Shkodra ndodhen në spital.
Protestuesit u mblodhën fillimisht pranë Ministrisë së Arsimit, ku u shkulën kangjellat dhe godina u godit me gurë, me dëme edhe në biznese në Rrugën e Durrësit. Më pas turma u drejtua drejt Parlamentit, ku policia përdori gaz lotsjellës për t’i shpërndarë. Tensionet vijuan pranë Ministrisë së Infrastrukturës, ku u thyen xhamat e godinës; disa vajza shtriheshin në rrugë duke bllokuar kalimin e efektivëve, të cilët ndërhynë me spraj, gaz dhe ujë.
Pas ndërhyrjeve, protestuesit u kthyen në Rrugën e Durrësit dhe qëndruan për orë të tëra; në zonën pas Muzeut Historik Kombëtar u dëmtuan dy biznese, në një prej të cilave u thye vitrina, u hynë brenda dhe u mor një fikëse zjarri që më pas u hodh mes materialeve të ndezura në rrugë. Protesta u zhvendos para Bashkisë së Tiranës dhe pranë selisë së Partisë Socialiste, ku pati hedhje gurësh dhe fishekzjarrësh dhe ndërhyrje me gaz.
Sulme u regjistruan edhe ndaj Ministrisë së Mjedisit (gjuajtje gurësh), Teatrit të Kukullave (xhamat e thyer), Ministrisë së Brendshme dhe Ministrisë së Ekonomisë (e sulmuar dhe i vu zjarr). Të paktën katër banka të nivelit të dytë u sulmuan dhe u dëmtuan në zona si qendra, “9-katësheve” dhe “Myslym Shyri”; në disa raste protestuesit hynë brenda, thyen xhama, morën dosje e dokumente dhe shkatërruan bankomate. U dëmtuan gjithashtu dyqane të kompanive telefonike, u dogjën kioska në qendër, dhe u vunë zjarr kabina roje pranë Agjencisë së Sigurisë Kibernetike dhe Ambasadës së SHBA-së.
Kryeministri Edi Rama përjashtoi mundësinë e dorëheqjes, duke thënë se qeveritë ndryshohen përmes zgjedhjeve demokratike dhe jo përmes dhunës, dhe u shpreh i gatshëm për dialog me studentët dhe për adresimin e kërkesave të tyre legjitime. Gjatë orëve të mbrëmjes protestuesit vazhduan sulmet ndaj ambienteve të Ministrisë së Brendshme dhe Ministrisë së Ekonomisë.
