Arabia Saudite ka anuluar dënimin me vdekje ndaj një punëtori emigrant nga Sri Lanka, i cili ishte dënuar për një koment të publikuar në Facebook që autoritetet saudite e konsideruan fyes ndaj Islamit dhe Profetit Muhamed. Lajmi u bë i ditur nga zëvendësministri i Jashtëm i Sri Lankës, Arun Hemachandra, i cili njoftoi se Gjykata e Lartë saudite ka rrëzuar dënimin ndaj 27-vjeçarit Anojan Sivarasa. Në një postim në Facebook, Hemachandra falënderoi autoritetet dhe ekipet ligjore të të dy vendeve për përpjekjet në këtë çështje, që kishte shkaktuar reagime të forta në Sri Lanka dhe kishte nxitur angazhim diplomatik për të kërkuar faljen e të dënuarit.
Sivarasa ishte dënuar me vdekje në shtator, pasi një gjykatë apeli në Arabinë Saudite e shpalli fajtor për blasfemi ndaj Islamit dhe Profetit Muhamed. Rasti lidhet me një debat në rrjetet sociale që shpërtheu në fund të qershorit, pas përhapjes së një videoje ku një i ri mysliman dukej duke goditur me shkelma një qen, pas një grupi pelegrinësh hindu. Videoja nxiti diskutime dhe përplasje virtuale me karakter fetar. Gjatë debatit, një përdorues publikoi komente përçmuese ndaj një hyjnie hindu, ndërsa Sivarasa reagoi në gjuhën tamile me një koment fyes ndaj Profetit Muhamed.
Sipas raportimeve, 27-vjeçari e fshiu shpejt komentin dhe publikoi një video ku kërkonte falje, por një fotografi e komentit u bë e njohur për punëdhënësin e tij dhe autoritetet saudite, çka çoi në arrestimin e tij në korrik. Fillimisht, Gjykata Penale e Al-Ahsa-s e kishte dënuar Sivarasën me pesë vjet burg dhe një gjobë prej tre milionë rialësh sauditë, rreth 800 mijë dollarë. Më pas, dënimi u rëndua në apel, duke u kthyer në dënim me vdekje, të cilin tani Gjykata e Lartë e ka rrëzuar.
Pavarësisht anulimit të dënimit me vdekje, ende nuk dihet nëse do të ketë procedura të tjera ligjore, nëse Sivarasa do të vijojë të mbahet në paraburgim apo sa do të zgjasë qëndrimi i tij në burg. Ligjvënësi nga Sri Lanka, Faizer Mustafa, që është përfshirë në negociatat ligjore, konfirmoi për BBC Sinhala se dënimi me vdekje është rrëzuar dhe se po shqyrtojnë vendimin e Gjykatës së Lartë për të kuptuar hapat e mëtejshëm. Familja kishte deklaruar se nuk kishte pasur kontakt të drejtpërdrejtë me të që prej 28 shtatorit. Çështja kishte tërhequr vëmendjen e organizatave ndërkombëtare për të drejtat e njeriut, të cilat kishin bërë thirrje Arabisë Saudite të mos e ekzekutonte. Joey Shea nga Human Rights Watch kritikoi përdorimin e ligjeve që parashikojnë dënime të rënda për deklarata të publikuara në internet, veçanërisht ndaj punëtorëve emigrantë.
