Në zonat bujqësore të Beratit, vjelja e ullirit, një prej kulturave kryesore për ekonominë e fermerëve vendas, do të shtyhet për shkak të kushteve të dobëta klimatike. Ndryshe nga vitet e kaluara, prodhimi i këtij viti pritet të jetë mjaft i pakët. Fermerët lidhin këtë ulje të pritshme të prodhimit kryesisht me thatësirën e gjatë dhe mungesën e reshjeve të shiut gjatë muajve të verës dhe në fillim të vjeshtës, faktorë që kanë ndikuar negativisht në zhvillimin e kokrrave.
Procesi i vjeljes nisi fillimisht me varietetet e ullirit të tavolinës, por rezultatet e para treguan probleme; kokrrat e ullirit janë të mpira. Sipas fermërve, vazhdimi i vjeljes në këto kushte do të shkaktonte humbje të konsiderueshme financiare, sepse produkti nuk arritet të ketë peshën dhe cilësinë e kërkuar për tregun. Për këtë arsye ata po përpiqen të fitojnë kohë dhe po presin zhvillime të motit, me shpresën se reshjet e ardhshme mund të përmirësojnë gjendjen e kulturave.
Fermerët shprehen se një shi i bollshëm në periudhën aktuale do të kishte efekt të menjëhershëm pozitiv: do të ndihmonte në fryrjen e kokrrave dhe do të rritte përqindjen e vajit në frutat ekzistuese. Një rritje e përqindjes së vajit dhe fryrja më e mirë e kokrrave do të rezultonte në një përmirësim të dukshëm të rendimentit përpara se të nisë vjelja masive e ullishteve. Prandaj, vendimi për të shtyrë vjeljen po mendohet si një masë parandaluese për të shmangur dalje në treg të një produkti me cilësi të dobët, që do të sjellë humbje ekonomike për fermerët.
Situata e krijuar reflekton shqetësimin e komunitetit bujqësor në Rajonin e Beratit për ndikimin e thatësirës në një prej kulturave të tyre kryesore. Fermerët mbeten të varur nga parashikimet e motit dhe nga ardhja e reshjeve për të përcaktuar kohën optimale të vjeljes dhe për të minimizuar humbjet.
