Dy persona humbën jetën dhe 16 të tjerë u plagosën në dy aksidente të ndodhura gjatë festivaleve tradicionale Danjiri në prefekturën e Osakës, në qytetet Izumisano dhe Izumiotsu. Sipas Asahi Shimbun, përmbysja e karrocave të mëdha prej druri ndodhi gjatë manovrave në rrugë, kur strukturat humbën ekuilibrin.
Të dy viktimat, një 51-vjeçar dhe një 48-vjeçar, ishin pjesëmarrës aktivë në festival dhe mbanin rolin “takari”, që synon të ruajë ekuilibrin e karrocave gjatë kthesave. Ata u shtypën nga karrocat pas humbjes së ekuilibrit të strukturave. Aksidenti i parë ndodhi rreth orës 11:00 në kryqëzimin Nagataki në Izumisano. Ekipet e shpëtimit nxorën nën strukturë një 51-vjeçar dhe e transportuan në spital, ku ai u shpall i vdekur. Shtatë persona të tjerë, me moshë nga 10 deri në 59 vjeç, u dërguan në spital; dy prej tyre me lëndime të rënda.
Rreth dy orë më vonë, në orën 13:20, në kryqëzimin Miyamachi në Izumiotsu u regjistrua aksidenti i dytë fatal. Një punëtor fabrike 48-vjeçar nga qyteti Izumi u shtyp nga një strukturë druri dhe humbi jetën. Nëntë persona të tjerë u dërguan në spital me lëndime që autoritetet i konsideruan jo kërcënuese për jetën.
Në të dyja rastet përmbysjet ndodhën gjatë manovrës së quajtur “yarimawashi”, ku pjesëmarrësit përpiqen të kthejnë shpejt karrocat shumëtonëshe në kënde të mprehta pa humbur vrullin. Policia po heton shkaqet e saktë të aksidenteve dhe dyshohet se karrocat humbën ekuilibrin gjatë kthesave të menjëhershme djathtas.
Festivali Danjiri është një traditë e njohur në rajonin e Osakës; komunitetet lokale drejtojnë karroca të mëdha prej druri, të zbukuruara me gdhendje dhe ornamente tradicionale. Karrocat, që mund të peshojnë disa tonë, tërhiqen me litarë nga grupe të mëdha njerëzish dhe lëvizin nëpër rrugët e qyteteve të shoqëruara me muzikë dhe brohoritje.
