Policia arrestoi tre persona në kuadër të operacionit të koduar “Detajet”, pasi dyshohet se kishin planifikuar një vrasje në zonën e Lezhës. Sipas njoftimit zyrtar, dy prej tyre ishin të armatosur dhe të pajisur me skafandra, duke lëvizur me një motomjet të vjedhur në Suedi në rrugën e vjetër “Pllanë-Lezhë”, ndërsa personi i tretë dyshohet se do t’i ndihmonte të largoheshin me automjet pas kryerjes së krimit.
Në pranga ranë Elden Tarja, 25 vjeç, banues në Barbullush; Kristian Ymeri (Shkambi), 34 vjeç, banues në Kamzë; dhe Vinçesk Piroli, 38 vjeç, banues në Kurbin. Policía njofton se Piroli ka precedentë të shumtë penalë për krime kundër personit, brenda dhe jashtë vendit.
Operacioni u zhvillua nga specialistët e Sektorit për Hetimin e Krimeve të Rënda në Drejtorinë Vendore të Policisë Lezhë, në bashkëpunim me Policinë e Shkodrës, pas marrjes së informacionit për lëvizjet e dyshimta të dy personave me skafandra në rrugën e vjetër “Pllanë-Lezhë”. Pas kontrolleve dhe patrullimeve në zonën e Lezhës dhe në drejtim të Shkodrës, në aksin “Gjadër-Barbullush” policia ndaloi një automjet tip “Volkswagen” ku udhëtonin tre të dyshuarit. Hetimet paraprake tregojnë se automjeti do të përdorej për largimin nga zona ku dyshohet se ishte planifikuar vrasja.
Gjatë kontrolleve fizike në motomjet, në banesën e 25-vjeçarit dhe në ambientet përreth saj u gjetën dhe u sekuestruan tre pistoleta me krehra e fishekë, municion luftarak, automjeti dhe motomjeti i përdorur në këtë rast. Nga verifikimet rezultoi se motomjeti ishte vjedhur në Suedi.
Materialet procedurale janë referuar Prokurorisë për veprime të mëtejshme. Në njoftim nuk jepen detaje të tjera mbi autorësinë e mundshme të vrasjes apo akuzat konkrete që do të ngrihen, përveç referimit të hetimeve dhe procedimeve të tjera që do të kryejnë organet përkatëse.
