Një statujë nudo e presidentit amerikan Donald Trump, e mbuluar me fletë ari 23 karatësh, është ekspozuar në ambientet e Parlamentit Europian në Strasburg. Skulptura 2.6 metra e lartë me titull “Murtaja Portokalli”, e njohur gjithashtu si “Mbreti i Padrejtësisë”, paraqet Trumpin të ulur mbi shpatullat e një burri të vogël e të rraskapitur, që duket i përkulur nën peshën e tij. Në duart e figurës janë një shkop golfi dhe Peshorja e Drejtësisë, ndërsa barku dhe kofshët mbulojnë kokën e personazhit që po e mban.
Në bazën e statujës është vendosur një mesazh që përmbledh simbolikën e veprës: “Jam ulur mbi shpinën e një burri. Ai po fundoset nën peshën time. Do të bëja gjithçka për ta ndihmuar. Përveçse të zbres nga shpina e tij.” Vepra është krijuar nga artisti danez Jens Galsjøt, i njohur për punimet me karakter politik dhe protestues. Galsjøt tha se zgjedhja e arit lidhet me pëlqimin e Trumpit për këtë metal dhe shtoi se mendon se “atë do t’i pëlqente kjo skulpturë.” Artistii deklaroi gjithashtu se përmes veprës synon të denoncojë atë që ai e sheh si kërcënime të Trumpit ndaj mjedisit dhe rendit ndërkombëtar të bazuar në rregulla, duke shtuar: “Trump po shkatërron gjithçka në të cilën unë besoj.”
Lakuriqësia e presidentit lidhet me një simbolikë tjetër: Galsjøt u frymëzua nga përralla e Hans Christian Andersenit “Rrobat e Reja të Perandorit”, ku sundimtari parakalon lakuriq, dhe vuri në dukje se humori dhe tallja e pushtetit janë elementë të rëndësishëm të artit të tij politik. Ekspozita është vendosur në një nga korridorët e frekuentuara të Parlamentit Europian, ku kalojnë çdo ditë eurodeputetë, punonjës dhe vizitorë; u përurua të martën dhe pritet të qëndrojë deri të enjten, më 8 tetor.
Pranë statujës janë vendosur mbi 1,000 miniatura të prodhuara me printera 3D, që vizitorët mund t’i marrin si objekte simbolike proteste. Nismën e ka marrë eurodeputeti danez Per Clausen, anëtar i Aleancës Kuqe-Gjelbër dhe i grupit të Majtë; sipas tij reagimi ka qenë kryesisht pozitiv, megjithëse ka pasur kundërshtime nga disa përfaqësues të së djathtës ekstreme. Ekspozimi në ambientet e Parlamentit Europian nuk do të thotë se institucioni mbështet mesazhin politik të veprës. Një zëdhënës i shërbimit për shtyp konfirmoi se ekspozita është miratuar nga Kuestorët e Parlamentit Europian. Donald Trump nuk ka komentuar për skulpturën.
