Kuvendi do të votojë të enjten ndarjen e re territoriale, pasi propozimi i Partisë Socialiste u miratua në komisionet e posaçme. Bashkëkryetari i Komisionit për Territorialen, Arbjan Mazniku, në emisionin “Top Story” shpjegoi arsyet e ndryshimeve, duke theksuar se disa bashki me probleme financiare nuk po arrijnë të përmbushin funksionet që u kërkohen.
Mazniku tha se një pjesë e madhe e diskutimeve ka qenë nga kryebashkiakë të PS-së që nuk kanë qenë dakord me reformën, por pranoi se nëse qëllimi do të ishte elektoral, strukturat do të ishin lënë siç ishin. Ai theksoi se objektivi i PS-së është që territori të ketë mekanizmat e nevojshëm për të kryer funksionet dhe që njerëzit të kenë shërbimet që synojnë: “Objektivi i PS-së është që ai territor t’i ketë mekanizmat e mundshëm që të kryejë funksionet që mund të bëjë. Jemi ende larg për të ofruar shërbimet që duhen dhe që njerëzit aspirojnë. PS ka marrë mandat nga njerëzit për t’u kujdesur për këtë. Ka interes dhe një axhendë për t’i siguruar mekanizmat e nevojshëm bashkive që të ushtrojnë funksionet.”
Ai theksoi ndër të tjera se vetëdija për pamundësitë e bashkive të vogla për shkak të mungesës financiare çon drejt zgjedhjes së bashkive më të mëdha, duke shtuar se kjo nuk i afron më pak qytetarit. Mazniku tha se ka pyetur kryetarët e bashkive të tij për shërbime që do t’u largoheshin qytetarëve pas ndryshimeve dhe dha shembullin Berat–Dimal–Poliçan, ku sipas tij “nuk kanë transport publik. Nuk kanë një zyrë të planifikimit urban.”
Ai vlerësoi Reformën e vitit 2014 si të suksesshme, duke thënë se ajo ka përmirësuar masivisht cilësinë e shërbimeve në bashki. Mazniku nënvizoi se nga 373 komuna dhe bashki më parë, shumë prej tyre nuk kryenin punët që bëjnë sot, por megjithatë “jemi ende larg” asaj që shumë bashki duhet të bëjnë dhe që qytetarët synojnë. Partia Socialiste, sipas tij, ka marrë mandat për të siguruar mekanizmat e nevojshëm për bashkitë, dhe jo për të mbrojtur interesat e individëve brenda strukturave lokale. Burim: Top Channel.
