Kapiteni i fluturimit FZ1073 të Flydubai, Sumit Machar, rrëfeu për telefon kryeministrit indian Narendra Modi momentet dramatike brenda kabinës së pilotit dhe përpjekjet për të shmangur një tragjedi në ajër. Machar, shtetas indian, ndodhet i shtruar në spital pasi u plagos rëndë gjatë përleshjes me bashkëpilotin e tij. Ai tha se bashkëpiloti, me shtetësi omaneze, nxori një thikë dhe e goditi disa herë teksa avioni nisi të humbte lartësi, duke e detyruar të luftonte për jetën e tij: “Në ato momente po luftoja për jetën time”, kujtoi ai.
Megjithëse i plagosur rëndë dhe i rrëzuar në dysheme, Machar arriti të kuptojë se avioni po zbriste dhe bëri një përpjekje të fundit për të hapur derën e kabinës së pilotit. Sipas rrëfimit të tij, sapo e hapi derën, të tjerë hynë brenda dhe secili luajti rolin e vet, duke mundësuar ndërhyrjen dhe, sipas pilotit, duke shmangur një tragjedi më të madhe në fluturimin drejt Tel Avivit. Ai tha se veproi edhe për t’i shpëtuar jetën e pasagjerëve dhe ekuipazhit: “I thashë vetes se po e bëja për jetën time, por në të njëjtën kohë e dija se nuk mund t’i lija të gjithë ata njerëz të vdisnin atje.”
Machar theksoi përvojën e tij si pilot: “Kam 17 vjet që pilotoj aeroplanë, 11 prej tyre si kapiten. Mund ta kuptoj çfarë po ndodh në aeroplan edhe me sytë mbyllur.” Ai foli edhe për trajtimin mjekësor pas uljes së avionit në Tabuk të Arabisë Saudite, duke thënë se aty mori kujdesin më të mirë të mundshëm.
Gjatë bisedës me kryeministrin Modi, pilotit i erdhën emocione; ai u shpreh mirënjohës dhe tha se Modi është modeli i tij më i madh. Machar tregoi gjithashtu se, për të përballuar dhimbjen dhe frikën, recitoi Hanuman Chalisa dhe ndjeu se kjo ndihmoi në shpëtimin e tij. Në mesazhet e shpërndara në rrjete sociale, Modi e përshëndeti kapitenin dhe i uroi shërim të shpejtë.
