Një fanellë e Michael Jordan e veshur në sezonin e tij të fundit me Chicago Bulls u shit për 12.3 milionë dollarë (rreth 10.5 milionë euro), duke vendosur rekord të ri përsa i përket objektave përkujtimorë të legjendës së basketbollit. Fanella ishte veshur nga Jordan në ndeshjen e tretë të Finales së NBA në 1998 kundër Utah Jazz, pjesë e sezonit të njohur si “Last Dance”. Ai udhëhoqi Bulls drejt fitores së serisë 4-2, duke fituar titullin e gjashtë në karrierë dhe u shpall MVP i finaleve për herë të gjashtë.
Ndeshja e tretë u zhvillua në Chicago, pas barazimit 1-1 në dy ndeshjet e para në Salt Lake City, dhe Bulls dominuan përballë Utah Jazz kryesisht falë 24 pikëve të Jordan në atë takim. Rekordi i mëparshëm për objektet e tij përkujtimore mbahej nga një tjetër fanellë e Jordan, e veshur në ndeshjen e parë të së njëjtës seri finale, e cila në vitin 2022 u shit për 10.1 milionë dollarë (rreth 8.6 milionë euro).
Fanella doli në ankand nga sipërmarrësi Ryan Gough dhe u shit përmes shtëpisë së ankandeve digjitale Joopiter, themeluar nga Pharrell Williams, e cila e kishte vlerësuar fanellën në një gamë prej 10-15 milionë dollarësh. Në të njëjtin ankand u shit edhe një Ferrari 550 Maranello i vitit 1997 që i përkiste Jordan, për 2.7 milionë dollarë (rreth 2.3 milionë euro).
Shtëpia e ankandeve Joopiter deklaroi: “Janë shumë pak objekte sportive që mishërojnë madhështinë kaq të plotë si fanella e ndeshjes së 3 të Jordan në Finalen e NBA në 1998.” Rekordi absolut për një objekt përkujtimor sportiv mbahet nga fanella e lojtarit të baseball Babe Ruth me New York Yankees, e veshur në World Series të 1932, që u shit për 24.1 milionë dollarë (rreth 20.5 milionë euro).
Top Channel.
