Erion Veliaj i përgjigjet kërkesës të përcjellë nga administrata e Kuvendit si përfaqësues i qytetarëve të Tiranës, duke shprehur mbështetje për nevojën e rishikimit të organizimit administrativo-territorial, por duke kërkuar respektim të garancive kushtetuese dhe standardeve të vetëqeverisjes vendore. Ai thekson se reforma duhet të matet jo vetëm me aftësinë për t’u miratuar, por me qëndrueshmërinë, funksionalitetin institucional dhe legjitimitetin.
Projektligji propozon kalimin nga 61 në 46 bashki dhe krijon një strukturë të re institucionale me status të veçantë për “qytetin”, duke ndryshuar hierarkinë e parashikuar nga ligji nr. 139/2015. Veliaj vëren mospërputhjen mes modelit të propozuar (Bashki–Qytet–Njësi Administrative/Fshat) dhe ligjit aktual (Bashki–Njësi Administrative–Qytet/Fshat), duke kërkuar harmonizim para miratimit. Ai paralajmëron se relacioni shpjegues nuk mund të zëvendësojë dispozitat juridike dhe se garancitë operative duhet të shfaqen në norma të qarta dhe të detyrueshme.
Sekuesenca procedurale kritikohet: zgjidhja territoriale është hartuar përpara marrjes së mendimit të popullsisë, duke rrezikuar që konsultimi të bëhet formalitet. Sipas Kushtetutës (neni 108 pika 2) dhe Kartës Europiane, mendimi i popullsisë duhet të merret më parë dhe në një fazë kur rezultatet e konsultimit mund të ndikojnë realisht në përmbajtje. Për Bashkinë Tiranë, Veliaj kërkon vlerësim të plotë demografik, administrativ dhe financiar për përfshirjen e njësisë “Rinas”.
Ai kërkon qartësi mbi përfaqësimin proporcional bazuar në “qytetet”: duhet përcaktuar çfarë është “qyteti” për qëllime zgjedhore, si garantohet barazia e votës dhe si përfaqësohen banorët e fshatrave. Gjithashtu duhet sqarim i regjimit kalimtar, pasi projektligji parashikon vazhdimin e organeve të zgjedhura deri në 2027, ndërsa ligji aktual parashikon zgjedhje të pjesshme kur krijohen njësitë e reja.
Veliaj kërkon kufizim të qartë të kompetencës së Këshillit Bashkiak për ndryshime të brendshme që nuk prekjnë kufijtë e jashtëm dhe thekson se transferimet territoriale midis bashkive duhet të bëhen me ligj të veçantë dhe në përputhje me nenin 108 të Kushtetutës. Ai propozon pezullimin e shqyrtimit përfundimtar të projektligjit deri në zhvillimin e konsultimit real, publikimin e metodologjisë dhe rezultateve, harmonizimin me ligjin nr. 139/2015 dhe përcaktimin e mekanizmit zgjedhor për përfaqësim proporcional. Letra mbyllet me theksin se mendimi i popullsisë duhet të përcaktojë përfundimin dhe se institucionet vendore duhet të ushtrojnë kompetencat e tyre në përputhje me Kushtetutën. Dokumenti shënohet si nënshkruar nga Erion Veliaj, Kryetar i Bashkisë Tiranë.
