Kombëtarja shqiptare vijon përgatitjet për ndeshjet e këtij edicioni të Nations League, me synimin kryesor që të luftojë për vendin e parë në grup. Trajnerët dhe stafi po përgatitin skuadrën për sfidat e radhës, ndërsa futbollistët përqendrohen në arritjen e rezultateve të mira kolektive.
Sulmuesi Mirlind Daku u paraqit përpara mediave në prag të këtyre sfidave dhe theksoi se fitorja e ekipit ka përparësi mbi paraqitjet individuale. Ai nënvizoi se është nder të jetë pjesë e kombëtares dhe se sulmuesit ftohen për të shënuar gola, por e renditi arritjen e rezultateve si prioritet: “Si gjithmonë është nder të jesh pjesë e kombëtares, kështu që golat janë arsyeja që ne sulmuesit ftohemi. Shpresojmë që të vazhdojmë këtë cikël të ri, të rikthehemi te shënimi i golave edhe për kombëtaren. Golat nuk i kemi shumë primarë, me rëndësi është që të fitojmë dhe të kalojmë sa më mirë këto ndeshje.”
Daku vlerësoi edhe konkurrencën brenda skuadrës si një aspekt pozitiv për rendimentin e ekipit. Ai përmendi se lojtarët e rinj që janë bashkuar me përfaqësuesen vijnë pas një fillimi sezoni të mirë në klubet e tyre dhe se kanë shënuar gola, çka e konsideron si gjë pozitive për ekipin kombëtar. Sipas tij, është e nevojshme të ketë gjithmonë lojtarë që ndodhen në formë dhe në momentin e duhur, për të ofruar zgjidhje të ndryshme në sulm.
Për sa i përket rolit të tij personal, Daku tha se nuk i ndryshon pritshmëritë konkurrenca dhe se ai do të presë momentin e tij. Ai theksoi se nëse i jepet mundësia të luajë, do të përpiqet t’i japë maksimumin për skuadrën: “Për mua nuk do të thotë asgjë do të pres momentin, nëse do më jepet mundësia do mundohem të jap më të mirën.”
Top Channel
