Rreth 300 sende personale të Brigitte Bardot do të dalin në ankand në Paris, një vendim që ka shkaktuar polemika pas vdekjes së ikonës së kinemasë franceze. Ankandi, i organizuar nga shtëpia Millon në Hotel Drouot, përfshin kapele prej kashte, një tutu e zezë, bereta, artikuj për kujdes personal, të brendshme dhe këpucë baleti Repetto, sende të cilat kanë qenë të ruajtura ndër vite në apartamentin e saj në Paris dhe në rezidencën e saj buzë detit, La Madrague, në Saint-Tropez. La Madrague, që Bardot e bleu në 1958 pas famës së fituar me filmin “Dhe Zoti… Krijoi Gruan”, është përmendur si vendmbajtëse e disa objektëve.
Bernard d’Ormal, bashkëshorti i fundit i Bardot, ka kundërshtuar publikisht ankandin, duke e cilësuar si mungesë respekti për kujtimin e saj. Ai ka thënë se sendet janë personale dhe se Bardot nuk do të kishte pranuar shitjen e tyre, duke shtuar se një pjesë e kësaj mund të ishte ruajtur për t’u vizituar në La Madrague. D’Ormal ka shprehur gjithashtu shqetësimin se pronat e Bardot në Saint-Tropez, La Madrague dhe La Garrigue, mund të shiten në të ardhmen, dhe ka deklaruar se ndihet i dëbuar pas 35 vjetësh jetese atje.
Sipas mediave të huaja, ankandi ka si qëllim mbledhjen e fondeve për Fondacionin Brigitte Bardot për mbrojtjen e kafshëve, të themeluar nga aktorja, si dhe për djalin e saj, Nicolas Sarrier. Çështja e trashëgimisë ka qenë pjesë e debatit: d’Ormal nuk mori pasuri nga testamenti i Bardot; ai vetë ka thënë se i kishte komunikuar bashkëshortes se nuk dëshironte të trashëgonte asgjë. Nga ana tjetër, Fondacioni Brigitte Bardot ka pretenduar se d’Ormal ishte president i fondacionit në kohën kur u miratua ankandi, pretendim që 85-vjeçari e mohon.
Brigitte Bardot vdiq në dhjetor në moshën 91-vjeçare. Ajo dhe Bernard d’Ormal ishin bashkë për rreth 30 vjet dhe u martuan fetarisht në Norvegji në vitin 1992; martesa nuk është njohur ligjërisht në Francë.
