Prof. Skerdi Prifti u nda papritur nga jeta, njoftoi Fakulteti i Mjekësisë në Tiranë përmes një postimi në Facebook, duke shprehur ngushëllimet për familjen dhe vlerësuar kontributin e tij në mjekësi, pedagogji dhe kërkim shkencor.
I diplomuar në Mjekësi në vitin 1986 dhe me gradën shkencore PhD të fituar në 1995, Prof. Prifti ndërtoi një karrierë të gjatë e të spikatur në fushën e gastrohepatologjisë, me fokus të veçantë në endoskopinë diagnostike dhe terapeutike. Ai drejtoi Njësinë e Endoskopisë pranë Shërbimit të Gastrohepatologjisë në Qendrën Spitalore Universitare “Nënë Tereza” (QSUT) dhe shërbeu si drejtues i Departamentit të Sëmundjeve të Brendshme në Fakultetin e Mjekësisë për dy mandate.
Formimin e tij profesional e pasuruan stazhet ndërkombëtare; si përfitues i bursave Fulbright, ai u trajnsua në Georgetown University, Washington D.C., në fushën e endoskopisë diagnostike dhe terapeutike, duke përfshirë përvojë në endoskopinë e avancuar dhe ERCP. Aktiviteti ndërkombëtar u shtri edhe në bashkëpunime shkencore me institucione në Danimarkë, Francë dhe Shtetet e Bashkuara, veçanërisht në kërkimet mbi Helicobacter pylori dhe patologjitë gastrointestinale.
Përtej aktivitetit shkencor, Prof. Prifti mbajti përgjegjësi të rëndësishme profesionale dhe organizative: ai shërbeu si President i Shoqatës Shqiptare të Gastrohepatologjisë dhe mori pjesë në jetën akademike duke dhënë mësim dhe udhëhequr departamentin e brendshëm të Fakultetit të Mjekësisë. Në përshkrimin e kolegëve, ai do të mbahet mend si pedagog që përcolli dije brezave të studentëve dhe mjekëve të rinj, si klinicist që bashkonte dijen shkencore me përvojën pranë pacientit dhe si bashkëbisedues në diskutimet profesionale e sfidat e mjekësisë universitare.
Fakulteti i Mjekësisë dhe shërbimi i gastrohepatologjisë e konsiderojnë largimin e tij një humbje për komunitetin mjekësor. Në njoftimin zyrtar shprehen ngushëllime të sinqerta për familjen dhe të afërmit, me urimin që kujtimi i Prof. Skerdit të mbetet i paharruar.
