Afrikano-jugorët kanë organizuar këtë javë protesta dhe aktivitete përkujtimore pas zbulimit të trupave të nëntë grave në Ekurhuleni, në lindje të Johanesburgut, çështje që ka rikthyer në vëmendje shqetësimet për dhunën ndaj grave në vend. Policia raportoi se trupat u gjetën gjatë dy muajve të fundit dhe po heton nëse vrasjet lidhen me njëra-tjetrën. Shumica e viktimave ishin në të 20-at dhe 30-at; disa u gjetën të zhveshura dhe me shenja që dyshohet se lidhen me sulme seksuale.
Të shtunën në mëngjes dhjetëra persona morën pjesë në një vrapim përkujtimor në Johanesburg për të nderuar Elizabeth Moselakgomo, një prej viktimave që ishte zhdukur pasi kishte dalë për vrap dhe u gjet e vdekur disa ditë më vonë. Pjesëmarrësit, të veshur me të zeza, ndezën qirinj dhe mbanin një banderolë me mesazhin: “Mjaft. Ndaloni vrasjen e femrave.”
Rastet kanë ringjallur zemërimin ndaj dhunës me bazë gjinore në Afrikën e Jugut, fenomen që u shpall katastrofë kombëtare në vitin 2025. Organizatat që mbrojnë të drejtat e grave thonë se masat dhe premtimet e autoriteteve deri tani nuk kanë arritur t’i bëjnë gratë të ndihem më të sigurta. Presidenti Cyril Ramaphosa deklaroi se vendi nuk mund të mësohet me një dhunë të tillë dhe u zotua se autoritetet do të hetojnë deri në fund rastet.
Megjithatë, organizatat e shoqërisë civile kritikojnë policinë për mungesën e burimeve dhe për probleme me korrupsionin. Aktivistët thonë se vetëm rreth një në 10 vrasje në vend arrin të zbardhet. Merlize Jogiat nga organizata Women for Change tha: “Duhet ta rishikojmë mënyrën se si funksionon policia. Arsyeja e vetme pse u gjetën këto nëntë gra ishte sepse kishte më shumë prani policore në zonë.”
Aktivistet kanë kundërshtuar edhe këshillat e policisë që gratë të marrin masa shtesë sigurie kur dalin vetëm për të vrapuar apo për të ecur, duke deklaruar: “Mos e vendosni më përgjegjësinë e sigurisë sonë mbi ne”, dhe duke kërkuar përgjegjësi dhe ndryshime institucionale për t’u garantuar siguri grave.
