Roberto Mancini ka bërë publike listën e parë pas rikthimit në stolin e kombëtares italiane, duke grumbulluar 34 lojtarë për katër ndeshjet e para të Nations League, në një periudhë të ngjeshur me katër takime brenda 11 ditësh. Trajneri, i cili udhëhoqi “Azzurrët” drejt triumfit në Euro 2020, ka përgatitur një grup që përzien emra me eksperiencë dhe të rinj që marrin mundësinë e parë në përfaqësuese.
Në listë spikasin nëntë emra që marrin për herë të parë ftesën në kombëtaren e madhe: portieri Massimo Pessina; mbrojtësit Daniele Ghilardi, Michael Kayode dhe Eddy Kouadio; mesfushorët Alessandro Romano dhe Issa Doumbia; si dhe sulmuesit Sebastiano Esposito, Antonio Vergara dhe Mohamed Alì Zoma. Këta futbollistë do t’i bashkohen grupit për të përballuar ritmin e ngjeshur të garës.
Mancini ka rikthyer edhe disa elementë të njohur: Nicolò Fagioli dhe Nicolò Zaniolo kthehen në kombëtare pas mungesave që datojnë nga tetori 2024, ndërsa Rolando Mandragora është ftuar sërish pas mbi pesë vitesh, me grumbullimin e tij të fundit të regjistruar në mars 2021. Mes të grumbulluarve figurojnë gjithashtu emra kryesorë të squadrit si Gianluigi Donnarumma, Alessandro Bastoni, Riccardo Calafiori, Giovanni Di Lorenzo, Federico Dimarco, Nicolò Barella, Sandro Tonali, Davide Frattesini, Moise Kean dhe Gianluca Scamacca.
Lista përfshin edhe Daniel Maldini, duke vijuar praninë e mbiemrit Maldini në histori të kombëtares italiane. Përzgjedhja e gjerë e Mancinit shihet si një zgjidhje praktike për të menaxhuar ngarkesën e ndeshjeve dhe për të pasur mundësi rotacioni gjatë një kalendari me pak pushime.
Italia nis fushatën e re në Nations League më 25 shtator në “Olimpico” të Romës ndaj Belgjikës. Tre ditë më pas do të luajë në transfertë ndaj Turqisë, më 2 tetor përballet me Francën në Saint-Denis, ndërsa më 5 tetor pret përsëri Turqinë, këtë herë në Bolonjë.
