Pas Doverit, qindra protestues u mobilizuan edhe në Portsmouth, duke tentuar të pengonin mbërritjen dhe transferimin e emigrantëve. Të veshur tërësisht me të zeza, me kapuça dhe fytyrat e mbuluara, demonstruesit lidhen nga mediat italiane me qarqe të së djathtës ekstreme jashtëparlamentare. Në fundjavë, të paktën 500 persona bllokuan për disa orë trafikun në portin e Doverit, nyja kryesore që lidh Britaninë e Madhe me Europën, duke shkaktuar probleme për udhëtarët. Protestuesit thërrisnin “Ndaloni varkat!”, duke iu referuar emigrantëve që mbërrijnë përmes Kanalit të La Manshit. Policia monitoroi situatën, por nuk ndërhyri.
Skena të ngjashme ndodhën në Portsmouth, ku pritej mbërritja e një varke me 140 emigrantë të paligjshëm, nisur disa orë më parë nga brigjet e Normandisë. Mjeti lundrues ishte shoqëruar fillimisht nga roja bregdetare franceze dhe më pas marrë në dorëzim nga autoritetet britanike në ujërat e tyre territoriale. Grupe protestuesish nga ekstremi i djathtë bllokuan rrugët e portit dhe u përpoqën të pengonin transferimin e emigrantëve drejt një qendre pritjeje. Këtë herë policia, e pajisur me mburoja dhe spraj me piper, ndërhyri për të shpërndarë turmën, por nuk pati arrestime.
Qeveria britanike dënoi sjelljen si “huligane”, duke theksuar se e drejta për protestë paqësore është themelore për demokracinë, por nuk duhet të shndërrohet në trazira. Zëvendësministrja e Thesarit, Emma Reynolds, pranoi se qytetarët kanë “shqetësime legjitime për emigracionin”, por tha se ato nuk duhet të shprehen në mënyrë kërcënuese. Ndryshe reagoi Reform UK e Nigel Farage: kreu i saj Lee Anderson tha se nuk është për t’u habitur që njerëzit dalin në rrugë për të shprehur zemërimin ndaj atyre që, sipas tij, “nuk kanë asnjë të drejtë të qëndrojnë në këtë vend”.
Pas mobilizimeve të fundjavës besohet të qëndrojë Danny Thomas, i njohur si “Danny Tommo”, një aktivist kundër emigracionit i lidhur me Tommy Robinson, të cilin media italiane e përshkruan si udhëheqës neofashist. Thomas krijoi këtë verë “Platformën e Patriotëve”, duke bërë thirrje për “rezistencë masive”, ndërsa grupet më radikale po e organizojnë veprimtarinë e tyre gjithnjë e më shumë përmes rrjeteve sociale.
