Ish-drejtuesja e kanalit shtetëror rus Russia Today, Xenia Fedorova, do të rikthehet në ekranet franceze si komentatore, pavarësisht se është dëbuar nga Franca dhe akuzohet për përhapje të propagandës pro-Kremlin. Ajo tashmë është pjesë e kanalit televiziv CNews, në pronësi të miliarderit Vincent Bolloré, dhe do të shfaqet në transmetim përmes videokonferencës, duke anashkaluar ndalimin për hyrje në territorin francez.
Lajmi ka shkaktuar reagime në qeverinë franceze. Ministri i Jashtëm, Jean-Noël Barrot, deklaroi se ishte “shumë i befasuar” dhe “zemërthyer” që grupe të mëdha mediatike po i hapin studiot dhe hapësirat e tyre personave që, sipas tij, janë dëbuar me të drejtë nga Franca. Barrot e akuzoi Fedorovën se ka vepruar si një “agjente propagande e Kremlinit” dhe tha se autoritetet franceze e kanë dëbuar atë pas akuzave për përfshirje në fushata dezinformimi të orkestruara nga Rusia, me synim destabilizimin e rendit publik në Francë.
Urdhri për dëbimin e Fedorovës u dha në fund të korrikut, pas muajsh polemikash lidhur me deklaratat dhe paraqitjet e saj publike në mbështetje të politikave të Vladimir Putinit. Autoritetet franceze vendosën gjithashtu ngrirjen e llogarive dhe aseteve të saj për gjashtë muaj.
Megjithatë, ndalimi i hyrjes në territorin francez nuk e pengon atë të marrë pjesë në programe televizive nga distanca. Prezantuesi i CNews, Gauthier Le Bret, konfirmoi se Fedorova do të rikthehet në ekran përmes videolidhjes për të ofruar komentet dhe analizat e saj.
Rikthimi i saj në median e kontrolluar nga Bolloré ka ngritur shqetësime në Francë për ndikimin e mundshëm në debatin publik, veçanërisht përpara zgjedhjeve presidenciale të vitit 2027. Ministri Barrot pyeti gjithashtu: “Pse të hapen studiot, të vihen në dispozicion rubrikat e gazetave dhe t’i jepen kohë mediatike dikujt që është provuar se po punon në shërbim të Rusisë kundër Francës dhe Bashkimit Evropian?”
