Ish-sekretari amerikan i Mbrojtjes dhe ish-drejtori i CIA-s, Leon Panetta, paralajmëron se konflikti mes SHBA-së dhe Iranit mund të vazhdojë edhe për gjashtë muaj të tjerë, duke rrezikuar të shndërrohet në një tjetër luftë të zgjatur amerikane në Lindjen e Mesme. Në një intervistë për The Guardian, ai tha se SHBA-të dhe Irani ndodhen në një ngërç të rrezikshëm me pak mundësi për një përfundim të shpejtë, duke krahasuar situatën me luftërat e dështuar në Irak dhe Afganistan.
Panetta tha se presidenti Donald Trump përballet me tre alternativa kryesore: të tërhiqet dhe të pranojë dështimin; të vazhdojë ngërçin aktual me sulme periodike nga të dyja palët; ose të ndërmarrë një veprim më agresiv për të siguruar kontrollin e Ngushticës së Hormuzit, me qëllim eliminimin e një prej mjeteve kryesore të presionit të Iranit. Ai deklaroi se “Ka shumë të ngjarë që kjo luftë të vazhdojë edhe për gjashtë muaj të tjerë pa u zgjidhur”.
Panetta e konsideron rihapjen e Ngushticës së Hormuzit si objektivin kryesor që do t’i jepte SHBA-ve mundësi për t’i dhënë konfliktit një rezultat të qartë. Ai argumentoi se aftësia e Iranit për të mbyllur ose penguar trafikun në këtë rrugë ujore është një nga instrumentet më të fuqishme të Teheranit ndaj SHBA-ve dhe ekonomisë globale, dhe se lufta mund të konsiderohet e fitueshme vetëm nëse Uashingtoni ndryshon në mënyrë dramatike strategjinë dhe vendos rihapjen e ngushticës në qendër të objektivave.
Panetta shprehu shqetësim edhe për situatën brenda Pentagonit, duke përmendur dorëheqjen e sekretarit të Ushtrisë, Dan Driscoll, dhe raportet për tensione mes zyrtarëve të lartë të mbrojtjes. Ai tha se trupat po dërgohen në luftë ndërsa ekzistojnë “trazira të jashtëzakonshme” në strukturën e komandës, gjë që mund t’u japë kundërshtarëve përshtypjen e dobësisë së Uashingtonit. Pentagoni kundërshtoi këto vlerësime, duke thënë se institucioni funksionon nën drejtimin e sekretarit të Mbrojtjes Pete Hegseth dhe duke e quajtur të pabazuara pretendimin e rrëmujës. Panetta gjithashtu kritikoi deklaratat e Trumpit se një marrëveshje për t’i dhënë fund luftës është pranë dhe se ngushtica është e hapur, duke vënë në dukje se këto fjalë mund të dëmtojnë besueshmërinë e presidentit. Zëvendëspresidenti JD Vance tha se nuk e konsideron konfliktin si një “luftë” dhe nuk di nëse përplasjet do të përfundojnë para zgjedhjeve të mesmandatit në nëntor.
