Lufta mes Rusisë dhe Ukrainës po hyn në një fazë më të rrezikshme, me intensifikim të sulmeve me rreze të gjatë dhe rritje të rrezikut për civilët dhe infrastrukturën. Këtë paralajmërim e dha Serhii Beskrestnov, këshilltar për teknologjinë e mbrojtjes pranë presidentit Volodymyr Zelensky, i njohur si “Flash”, që tha se asnjëra palë nuk është në gjendje ta fitojë plotësisht konfliktin. Ai vuri në dukje se bllokimi në vijën e frontit po zhvendos luftën drejt qyteteve dhe infrastrukturës kritike, ndërsa të dyja palët po rrisin kapacitetet për sulme të thella dhe mbrojtja ajrore po has vështirësi për të përballuar numrin në rritje të raketave dhe dronëve.
Beskrestnov paralajmëroi se pas përfundimit të luftës të dyja vendet mund të përballen me dëme të mëdha ekonomike dhe shkatërrim të infrastrukturës. Ai shprehu shqetësim të veçantë për muajt e dimrit dhe mundësinë që sulmet ruse të godasin sistemet e energjisë elektrike, ujit dhe ngrohjes në Kiev, gjë që mund të krijojë një krizë humanitare të rëndë në kryeqytet. Ai sugjeroi që autoritetet duhet të përgatiten për evakuime të mundshme të civilëve më të rrezikuar, veçanërisht të moshuarve, duke theksuar se kjo nuk ishte një deklaratë zyrtare e qeverisë ukrainase.
Presidenti rus Vladimir Putin ka urdhëruar ushtrinë të përgatitet për sulme masive ndaj objekteve energjetike të Ukrainës. Sipas The Guardian, Ukraina po përgatitet të rrisë sulmet me dronë në territorin rus, me synimin për të shtuar numrin e sulmeve të thella nga rreth 300 në ditë deri në 1,000, me objektiva ushtarake dhe ekonomike. Beskrestnov tha se Ukraina mund të synojë edhe ndërprerjen e trafikut ajror civil në Rusi përmes pranisë së dronëve në zonat e aeroporteve.
Ai paralajmëroi gjithashtu për zhvillimin e teknologjive ushtarake nga Rusia, përfshirë dronë me motorë reaktivë dhe përdorimin e mundshëm të inteligjencës artificiale për operacione autonome, çka mund të dobësojë sistemet ukrainase të luftës elektronike. Ukraina ka nevojë për më shumë sisteme dhe raketa Patriot, dhe Beskrestnov nuk është i sigurt nëse do të sigurohen mjaftueshëm para dimrit. Disa kompani ukrainase po zhvillojnë interceptorë të rinj me motorë reaktivë, por këto ende nuk janë gati për prodhim masiv.
