Zjarri që shpërtheu mbrëmjen e djeshme rreth orës 20:00 në kodrat përreth Himarës është izoluar, ndërsa situata raportohet e qetësuar, por ende nën vëzhgim. Flakët u përhapën me shpejtësi, të favorizuara nga erërat e forta dhe temperaturat e larta, duke rrezikuar banesa, hotele dhe sipërfaqe të konsiderueshme me ullinj.
Për shkak të terrenit të vështirë dhe përmasave të zjarrit, zjarrfikësit e Himarës kërkuan ndihmën e forcave nga bashki të tjera të vendit. Në terren u angazhuan rreth 300 forca, përfshirë zjarrfikës dhe pjesëtarë të Forcave të Armatosura, të cilët kontribuan në operacionin e izolimit të flakëve. Nënkryetari i Bashkisë Himarë, Pervin Gjikuria, ndoqi nga afër përpjekjet për të vënë nën kontroll zjarret dhe për të mbështetur koordinimin e ndërhyrjes.
Banorët raportojnë dëme të konsiderueshme. Më shumë se 6,000 rrënjë ullinj shekullorë janë përfshirë nga flakët, ndërsa gjashtë banesa u dëmtuan, tre prej të cilave rezultonin të braktisura. Sipas banorëve, zona përjetoi një nga zjarret më të mëdha të vërejtura në dekadat e fundit.
Falë ndërhyrjes së forcave zjarrfikëse dhe të Forcave të Armatosura, zjarri u izolua dhe situata u qetësua, por strukturat e emergjencës dhe ekipet në terren mbeten në gatishmëri. Autoritetet paralajmërojnë se rreziku nuk është zhdukur plotësisht, sepse vatrat e nxehta, trungjet e ullinjve të djegur dhe humusi mund të favorizojnë riaktivizimin e flakëve.
Forcat e emergjencës vazhdojnë monitorimin e zonës për të shmangur çdo rindezje të mundshme, ndërsa popullata e Himarës u bëhet thirrje të tregojë kujdes dhe të ndjekë udhëzimet e autoriteteve. Më tej, operacionet e patrullimit dhe kontrollit të zonave të prekura po vazhdojnë derisa rreziku të vlerësohet plotësisht i eliminuar.
