Kuorumi prej 80 deputetësh për zgjedhjen e presidentit të Kosovës nuk u sigurua nga Lëvizja Vetëvendosje (LVV) dhe Lidhja Demokratike e Kosovës (LDK). Palët më 31 gusht propozuan si kandidat Bekim Sejdiun, ish-gjyqtarin e Gjykatës Kushtetuese, i cili të martën nuk mori mbështetjen e gjashtë deputetëve të LDK-së.
Për LVV-në, marrëveshja mbetet e vlefshme dhe kryeministri Albin Kurti synon të takojë sërish kreun e LDK-së, Lumir Abdixhikun. “Do të zhvillojmë edhe takime edhe mbledhje, për ne, marrëveshja politike ende është valide”, tha Kurti. Ndërkaq Abdixhiku konsideron veprimin e deputetëve të LDK-së si shkak për zgjedhje të reja. “Dje u refuzua zgjidhja e Presidentit të Kosovës. U refuzua votimi i kandidatit të propozuar nga LDK-ja dhe, me këtë refuzim, u përcaktua edhe fati i vendit, zgjedhje të reja. Dëm mund të bëjë çdo kush. Për këtë, ja dora”, shkroi ai, duke shprehur indinjatën ndaj gjashtë deputetëve të partisë.
Sipas njohësve të politikës, zhvillimet e fundit e afrojnë më shumë vendin drejt zgjedhjeve të reja sesa drejt një marrëveshjeje për president. Analisti Arbnor Sadiku tha se “mund të konsiderohet se ka pasur një dështim dhe në të njëjtën kohë që vendi është më afër zgjedhjeve të reja sesa mund të ketë një marrëveshje të re. Krejt kjo situatë ndodhet në duart e z. Kurti, varësisht se si dëshiron të orientojë situatën”.
Njohësit vënë në dukje dy opsione që ka Kurti: ta çojë vendin menjëherë në zgjedhje, ose të kërkojë zgjidhje për presidentin duke negociuar për vota me deputetë të partive veç e veç, ose duke propozuar kandidat tjetër. “Nëse dëshiron të shkojë në zgjedhje, mund ta dërgojë vendin menjëherë. Nëse dëshiron të gjejë zgjidhje, me këtë kandidat të gjejë ndonjë votë duke negociuar me ndonjë deputet të partive veç e veç apo edhe të ndryshojë fare kandidatin”, tha Sadiku.
Kurti si kryetar i LVV-së ka të mbyllur derën e bashkëpunimit me Partinë Demokratike të Kosovës, e cila do të qëndrojë në opozitë. Aleanca ka vendosur gjashtë kushte, përfshirë pranimin e projektit të gazit amerikan; pa plotësimin e këtyre kushteve ata nuk do t’i ndihmojnë Kurtit në zgjedhjen e presidentit. Kosova mbajti zgjedhjet e jashtëzakonshme më 7 qershor, pas dështimit për të zgjedhur president në fillim të vitit.
